Athugið þessi frétt er meira en 1 mánaða gömul.

Snjóflóð féll á veginn um ÓIafsfjarðarmúla

18.01.2021 - 22:30
Mynd með færslu
 Mynd: aðsend mynd: Ingvar Erlingsson - RÚV
Veginum um Ólafsfjarðarmúla milli Ólafsfjarðar og Dalvíkur var lokað í kvöld eftir að snjóflóð féll yfir hann í kvöld á áttunda tímanum. Vegurinn verður lokaður að minnsta kosti þar til í birtingu á morgun vegna snjóflóðahættu. Þá verða aðstæður metnar og ákvörðun tekin um framhaldið. Þetta kemur fram á vef Vegagerðarinnar.

Ófært er á Þverárfjalli og þæfingsfærð á Siglufjarðarvegi en hálka eða snjóþekja annars á svæðinu og éljagangur eða skafrenningur allvíða. Óvissustig er á Siglufjarðarvegi vegna snjóflóðahættu. 

Við Heiðarsporð á Holtavörðuheiði verður umferðarhraði lækkaður niður í 50 km á klukkustund og gæti komið til stuttra lokana næstu vikur, vegna vinnu á svæðinu.

Á Vestfjörðum er þæfingsfærð og skafrenningur á Þröskuldum og Klettshálsi en á öðrum leiðum er hálka eða snjóþekja og víða skafrenningur.

Umtalsverðar slitlagsskemmdir eru á Bíldudalsvegi, á Mikladal og í Tálknafirði. Skemmdirnar eru mestar á Mikladal á um 4-5 km kafla og eru vegfarendur beðnir um að aka varlega þar sem aðstæður gætu verið varasamar á köflum.

Þá verða tafir á umferð frá miðnætti í nótt í Hvalfjarðargöngum vegna prófana á búnaði.

Valgerður Árnadóttir
Fréttastofa RÚV