Athugið þessi frétt er meira en 4 mánaða gömul.

Ratcliffe sagður mæta andófi íslenskra bænda

17.01.2021 - 16:04
Mynd með færslu
 Mynd: INEOS Group - Jim Ratcliffe
Breski milljarðamæringurinn Jim Ratcliffe er sagður standa frammi fyrir miklu andófi íslenskra bænda vegna viðamikilla jarðakaupa sinna. Auðkýfingurinn breski hefur keypt víðfeðm víðerni á Íslandi, til verndar og viðhaldi laxastofnsins í Norður-Atlantshafi.

Frá þessu er greint í netútgáfu götublaðsins Daily Mail og að Halicilla, eignarhaldsfélag Ratcliffes, hafi varið 36 milljónum sterlingspunda til þess að eignast alls 39 jarðir á Íslandi frá árinu 2016. Það er jafnvirði ríflega sex milljarða króna.

Breyting á jarðalögum á Íslandi, á þann veg að lögbundin hámarkseign hvers og eins megi vera 1.500 hektarar lands og að leita beri umsagnar sveitarfélags um kaup umfram það, geti orðið til þess að Ratcliffe neyðist nú til að láta af frekari kaupum jarða í landinu.

Í umfjöllun Daily Mail er haft eftir Sigrúnu Davíðsdóttur blaðamanni að Ratcliffe eigi flestar jarðir allra í landinu og að gegnsæi hafi skort við kaup hans á jörðum sem hafa verið í eigu sömu fjölskyldna um aldir. Ratcliffe er sagður eiga meðal annars land að Hofsá, Selá, Hafralónsá, Miðfjarðará og Vesturdalsá.

Jafnframt kemur fram í máli Sigrúnar að almennar áhyggjur séu uppi um framtíðarnyt þeirra jarða sem Ratcliffe hefur eignast. Hann skorti öll tengsl við samfélagið og að fyrirætlanir hans um vernd laxastofna hljómi eins og grænþvottur enda eigi hann Ineos, eitt stærsta olíuvinnslufyrirtæki veraldar.

Á hinn bóginn glati íslenskir bændur haldi sínu á landinu, ánum og ábata af veiðiréttindum í þeim. Einnig er haft eftir sauðfjárbóndanum Jóhannesi Sigfússyni að það geri engum gott að eignast jafn mikið land og raunin sé með Ratcliffe.

Ekki mun hafa náðst í forsvarsmenn Ineos, olíuvinnslufyrirtækis Ratcliffes, við gerð fréttar Daily Mail. Vitnað er í Gísla Ásgeirsson, framkvæmdastjóra Veiðiklúbbsins Strengs, sem segir að vernd laxastofna sé eina markmið Ratcliffes með jarðakaupunum, grunsemdir um annað séu fjarstæðukenndar.