Athugið þessi frétt er meira en 7 mánaða gömul.

Brexit-raunir í breskum sjávarútvegi

15.01.2021 - 17:30
Mynd: EPA / EPA
Hvort sem Brexit reynist sú happaleið líkt og helstu talsmenn þess, til dæmis Boris Johnson forsætisráðherra, hafa lofað þá er ljóst að hér og nú skapar Brexit ýmis vandamál. Forsvarsmenn sjávarútvegs krefjast nú styrkja og stuðnings fyrir tap, sem þeir eru að verða fyrir. Breska stjórnin lofar 100 milljónum punda í sjávarútvegsstyrki. Evrópusambandið hyggst verja 5 milljörðum evra í slíka styrki í Evrópu, þar af fá Írar einn milljarð.

Brexit og viðskiptasamningur og enginn vandi

Þetta virtist allt svo einfalt á aðfangadag, þegar Boris Johnson forsætisráðherra Breta kynnti þjóðinni viðskiptasamning sem hann hafði nú náð, seint og um síðir, við Evrópusambandið. Í fyrsta skipti síðan 1973 yrði Bretland fullvalda strandríki með fulla stjórn á miðunum, sagði forsætisráðherra.

Brexit-gleðiboðskapur jólanna drukknar í harmasöng bresks sjávarútvegs

Þessi gleðiboðskapur drukknar þó þessa dagana í harmasöng úr breskum sjávarútvegi. Í samtali við Spegilinn nýlega sagði Barrie Deas formaður Breska sjómannasambandsins að hann óttaðist að sjávarútvegurinn stæði verr eftir Brexit en áður. – Veiðistjórn kemur ekki í stað markaðar. Fyrir sjávarútveginn er viðskiptasamningurinn við ESB í fáu sambærilegur við aðild að markaðs- og tollabandalagi ESB. Eftir óhindruð viðskipti í áratugi er Bretland nú útlönd fyrir ESB-löndin 27.

Blómstrandi skelfiskútflutningur fölnar

Það breytir ýmsu. Bæði útflytjandi í Bretlandi og innflytjandi í ESB-landi þurfa nú að standa skil á ýmiss konar tollskjölum og heilbrigðisvottorðum, sem tefur sendingar. Í Skotlandi hefur verið blómstrandi útflutningur á ferskum skelfiski til Frakklands. Lostæti, sem Frakkar meta að verðleikum.

Líf skosks skelfiskútflytjanda breytist í martröð

Ian Blackford er þingflokksformaður Skoska þjóðarflokksins á breska þinginu. Í fyrirspurnartíma forsætisráðherra á miðvikudaginn rakti Blackford raunir eins skosks fiskútflytjanda.

Líf skelfiskútflytjanda í Lochaber, kjördæmi Blackfords, er nú algör martröð, sagði Blackford. Eftir að hlaða skelfiski á flutningabílinn á mánudaginn, eins og hann hefur gert í 35 ár, komu upp alls kyns hindranir sem þýddi að sending upp á 40  þúsund pund, sjö milljónir króna, tafðist og eyðilagðist þá. Tekjumissir fyrir hundrað skoskar fjölskyldur.

Hvar er hafsjór Brexit-tækifæranna sem var lofað?

Hvar er þessi hafsjór tækifæri, sem forsætisráðherra og skoskir flokksbræður hans lofuðu? spurði Blackford.

Forsætisráðherra svaraði, ríkisstjórnin myndi leggja 100 milljónir punda í sjávarútveg í Skotlandi og annars staðar. Hermdi síðan upp á Blackford og flokk hans, sem forsætisráðherra af ásetningi kallar stöðugt röngu nafni, að þeirra galni ásetningur væri að brjóta upp Bretland og draga Skotland aftur inn í ESB. Fáránlegt að kasta þannig Brexit-tækifærum fyrir borð, sagði forsætisráðherra.

Skoskur sjávarútvegur tapar 180 milljónum króna á dag

Blackford hnykkti á að skoskur sjávarútvegur tapaði milljón pundum, tæplega 180 milljónum króna, á dag. Stór hluti flotans væri bundin við bryggju og þeir sem veiddu lönduðu frekar í Danmörku til að losna við Brexit-skriffinnskuna. Á því tapar skosk fiskvinnsla.

ESB styrkir sinn sjávarútveg

Evrópusambandið hefur sett fimm milljarða evra í Brexit-sjóð, nú ljóst að Írar fengju einn milljarð þaðan – hvenær fengi skoskur sjávarútvegur eitthvað viðlíka og hvaða bætur fengi útflytjandinn í Lochaber, spurði Blackford. Forsætisráðherra svaraði ekki spurningunni en réðst á stefnu Skoska þjóðarflokksins. Flokknum nær að beita kröftunum gegn Covid-farsóttinni.

Af hverju er ekki róið?

Fleiri þingmenn hafa í vikunni krafið forsætisráðherra svara um sjávarútveginn. Hillary Benn þingmaður Verkamannaflokksins spurði forsætisráðherra hvernig stæði á því að breski flotinn væri bundinn við bryggju í stað þess að stunda veiðar og fékk heldur fálmkennt svar.

Forsætisráðherra sagðist skilja örvæntingu sjómanna og annarra í samfélaginu sem ættu við að glíma, að sínu mati, tímabundna örvæntingu vegna alls konar vandamála. Þeir fengju bætur. – Þó enn ekkert áþreifanlegt um hvernig bætur eða hvenær.

Fiskurinn örugglega hamingjusamur að vera breskur

Í þinginu viðraði íhaldsþingmaðurinn Jacob Rees-Mogg og ákafur Brexit-sinni sína skoðun á vanda sjávarútvegsins. Lykilatriðið er, sagði Rees-Mogg, að við náðum stjórn á fiskinum okkar sem er því betri og hamingjusamari en áður. – Ummæli sem þingforseti var ekki viss um að hægt væri að sannreyna.

Tónninn í forsætisráðherra eflir sjálfstæðisþrá Skoska þjóðarflokksins

Í takt við vaxandi Brexit-vanda skoskrar sjávarútgerðar vaxa vinsældir Skoska þjóðarflokksins. Skoðanakannanir sýna að við blasir met kosningasigur hans í maí. Tónn forsætisráðherra til Skota virðist fremur hjálpa sjálfsstæðisöflum í Skotlandi en styrkja einingu Bretlands.

 

sigrunda's picture
Sigrún Davíðsdóttir