Tónlistarmaðurinn Hermigervill heyrist í Undiröldunni í hverri viku þegar upphafsstefið ómar. Rétt fyrir jól sendi hann frá sér á lítilli plötu samstarf sitt við samfélagsmiðlapésann og sprelligosan Villa Neto sem heitir Está Na Hora sem minnir á suðrænan kokteil og sand á milli tánna.
Á næstsíðasta degi ársins 2020 sendi sveitin Russian.Girls frá sér lagið Drepa mann ásamt myndbandi. Lagið er af væntanlegri þröngskífu sem talsmenn sveitarinnar áætla að komi út í byrjun árs hjá bbbbbb records
Pínu Litlar Peysur er ný íslensk post-pönkhljómsveit, sem sendi frá sér fjögurra laga þröngskífu PLP LP þann 23. desember. Með henni fylgdi líka þeirra fyrsta tónlistarmyndband við lagið Spítt í kaffið sem er að finna á áðurnefndri skífu.
Hljómsveitin Sorg hyggur á útgáfu Kveður norna kalda raust í byrjun árs á helstu netveitum og vinyl Platan er 10 laga konseptplata sem fjallar um nornina Ljósbjörgu og hræðileg örlög hennar og inniheldur lagið Eldr.
Hljómsveitin Alchemia hefur starfað í hátt í áratug og hyggur nú á útgáfu af sinni fjórðu plötu í fullri lengd. Áður hefur þessi hressi metalkvartett sent frá sér plöturnar Alchemia 2011, Insanity 2014, Lunatic Lullabies 2016.
Á dögunum kom út Allt þetta helvítis myrkur sem er önnur breiðskífa hljómsveitarinnar Kötlu sem hefur vakið athygli út fyrir landsteinana. Katla er sveit þeirra Guðmundar Óla Pálmasonar úr Sólstöfum og Einars Thorberg Guðmundssonar úr sveitunum Fortíð og Potentiam.
Harðkjarna hljómsveitin Hvati er að eigin sögn verkefni sem var stofnað upp úr gagnlausum leiðindum og óheftri sköpunargleði. Sveitin sem er í þyngri kantinum er undir áhrifum frá pönki og öfga-þungarokksveitum og var stofnuð í fyrra.
