Mynd: Birgir Þór Harðarson - RÚV
Búið að sækja um tekjufallsstyrki fyrir 2,7 milljarða
419 rekstraraðilar sóttu um tekjufallsstyrki fyrir um 2,7 millljarða króna fyrstu dagana eftir að opnað var fyrir umsóknir 11. janúar vegna tekjufalls rekstraraðila á tímabilinu 1. apríl til og með 31. október 2020. Skatturinn fer með framkvæmd úrræðisins. Búið er að afgreiða 69 umsóknir fyrir um 590 milljónir króna.
Þetta kemur fram í tilkynningu frá fjármála- og efnahagsráðuneytinu í dag.
Síðustu mánuði hafa yfir 3.000 fyrirtæki og tugþúsundir einstaklinga nýtt sér úrræði stjórnvalda. Þannig hafa um 1.200 rekstraraðilar fengið lokunarstyrki fyrir um 1,7 milljarða króna, samkvæmt tilkynningunni.
Enn er bið á því að opnað verði fyrir umsóknir um viðspyrnustyrki sem Alþingi samþykkti að veita fyrir jól og stefnt er að því að veita fram á mitt þetta ár. Þeir gagnast helst minni fyrirtækjum og meðalstórum. Gert er ráð fyrir að allt að 15 til 20 milljarðar fari í úrræðið úr ríkissjóði.
103 milljarðar í úrræði 2020
Starfshópur fjármála- og efnahagsráðuneytisins um úrræði vegna heimsfaraldurs áætlaði fyrr í janúar að umfang mótvægisaðgerða ríkisins fyrir árið 2020 verði 103 milljarðar króna eða um 3,6% af vergri landsframleiðslu.
Eftirfarandi yfirlit yfir efnahagsaðgerðir ríkisins vegna kórónuveirufaraldursins kemur frá fjármála- og efnahagsráðuneytinu:
