Athugið þessi frétt er meira en 5 mánaða gömul.

Stjórnvöld sýni veitingahúsum fullkomið skilningsleysi

13.01.2021 - 19:44
Veitingastaður
 Mynd: Fréttir
Samtök fyrirtækja á veitingamarkaði, SVF, lýsa yfir sárum vonbrigðum með það sem þau segja fullkomið skilningsleysi stjórnvalda á aðstæðum veitingastaða í yfirlýsingu í dag. Skilningsleysið raungerist enn og aftur í nýjum sóttvarnarreglum sem tóku gildi þann 13. janúar. segir í tilkynningunni.

Nær helmingur lifi ekki af út febrúar 

SVF sendi út skoðanakönnun meðal fyrirtækja í greininni í desember og kom þar fram að nærri helmingur svarenda telja rekstur sinn ekki lifa út febrúar 2021 án frekari tilslakana á fjöldatakmörkunum og skorðum á opnunartíma.

„SFV sjá engin haldbær rök fyrir þeim takmörkunum sem settar eru á veitingageirann og því ósamræmi sem birtist okkur í tilslökunum í öðrum greinum, s.s. leikhúsum og verslunum. Það er öllum ljóst að aðgerðir stjórnvalda hafa kippt stoðunum undan rekstrargrundvelli veitingastaða. Greinin hefur mátt búa við fjöldatakmarkanir í tæpt ár og úrræði stjórnvalda hafa verið afar takmörkuð á sama tíma. SVF taka á sama tíma heilshugar undir sjónarmið rekstraraðila kráa og bara sem hafa þurft að upplifa óútskýranlegt ósamræmi og rökleysu hvað varðar sóttvarnarreglur sem þeim er gert að hlíta.“

Skora á stjórnvöld að endurgreiða virðisaukaskatt

SVF skorar því á stjórnvöld að hækka hámarksfjölda viðskiptavina í 50 manns líkt og hjá verslunum, að opnunartími veitingastaða verði til kl. 23.00, að kráir og barir fái að starfa skamkvæmt sömu skilmálum og veitingastaðir og loks að hið opinbera hjálpi endurreisn veitingageirans með skattaívilninum í framtíðinni með tímabundinni endurgreiðslu virðisaukaskatts í tólf mánuði frá júlí 2021til júlí 2022 til að aðstoða greinina til viðspyrnu eftir þessa erfiðu tíma.