Mynd: Þór Ægisson - RÚV
Athugið þessi frétt er meira en 8 mánaða gömul.
Vonast til að rannsókn á andlátum ljúki í vikunni
Athugun sérfræðinga vegna mögulegra alvarlegra aukaverkana af bóluefni Pfizer við Covid-19 hófst 6. janúar og vonir standa til að niðurstöður liggi fyrir í lok vikunnar. Lyfjastofnun hefur fengið nokkrar tilkynningar um mögulegar alvarlegar aukaverkanir eftir bólusetningar hjá öldruðu fólki og í ljósi þess að um nýtt bóluefni er að ræða var ákveðið að fá óháða sérfræðinga til að rannsaka möguleg tengsl.
Lyfjastofnun hefur fengið sex tilkynningar um mögulegar alvarlegar aukaverkanir af bóluefni Pfizer við Covid-19, þar af fimm andlát. Í öllum tilvikum voru tilkynningarnar vegna háaldraðs fólks með undirliggjandi sjúkdóma, búsett á hjúkrunarheimilum. Talið er ólíklegt að það sé fylgni þarna á milli, en Landlæknir, sóttvarnarlæknir og forstjóri Lyfjastofnunar ákváðu engu að síður að láta rannsaka tengslin þar sem um nýtt bóluefni er að ræða. Þegar niðurstöður rannsóknarinnar liggja fyrir verður skoðað hvort breyta þurfi nálgun að bólusetningum eldri einstaklinga. Rannsóknin hófst 6. janúar og vonast er eftir því að hún taki um það bil viku eða tíu daga, sem þýðir að niðurstöður ættu að skila sér í þessari viku.
Fá upplýsingar frá nágrannalöndunum
Jafnframt hefur verið kallað eftir upplýsingum frá Norðurlöndunum og frá Lyfjastofnun Evrópu um hvort sjá megi aukna tíðni dauðsfalla hjá eldri einstaklingum sem hafa verið bólusettir í öðrum Evrópulöndum undanfarna daga og vikur. Þá fer fram sérstök tölfræðigreining á dauðsföllum í þessum hópi á vegum embættis landlæknis, er segir í tilkynningu frá embættinu.
