Athugið þessi frétt er meira en 3 mánaða gömul.

Stórt skref stigið í átt að uppbyggingu á svæði KA

11.01.2021 - 13:19
Mynd með færslu
 Mynd: ka.is - RÚV
Knattspyrnufélag Akureyrar og Akureyrarbær skrifuðu um helgina undir viljayfirlýsingu um uppbyggingu íþróttamannvirkja á svæði félagsins. Í því felst að KA er heimilt að hefja vinnu við nýtt deiliskipulag á félagssvæði sínu við Dalsbraut.

Horfa til byggingu gervigrasvallar, áhorfendastúku og félagsaðstöðu

Það voru þau Ingvar Már Gíslason, formaður KA og Ásthildur Sturludóttir, bæjarstjóri, sem undirritaði samninginn í tilefni 93 ára afmælis félagsins á föstudaginn. Í viljayfirlýsingunni felst að KA er heimilt að hefja vinnu við nýtt deiliskipulag á félagssvæði sínu við Dalsbraut. Horft verður til framtíðar við skipulagsvinnuna meðal annars með byggingu gervigrasvallar, áhorfendastúku og félagsaðstöðu.

Risaskref fyrir félagsstarfið hjá KA-mönnum

Við sama tækifæri greindi Ásthildur frá því að gert væri ráð fyrir því í fjárhagsáætlun bæjarins að á árunum 2021 til 2024 færu 600 milljónir króna í uppbyggingu á svæðinu. 

„Ég held að við getum öll verið ánægð með þessa viljayfirlýsingu sem hér er undirrituð. Ég held að það geti allir verið sammála hér um það að það sé risaskref fyrir félagsstarfið hjá KA-mönnum að geta farið í þetta verkefni. Þannig að ég óska ykkur til hamingju og hlakka til þessa samstarfs okkar á milli og hlakka til þegar við getum séð glæsilega uppbyggingu á þessu svæði hér verða að veruleika, “ sagði Ásthildur við undirritunina. 

Nákvæm áætlun um verkefnið kemur síðar

„Fyrirhugað er að þegar deiliskipulag liggur fyrir og það samþykkt af bæjarstjórn verði gerður samningur við Akureyrarbæ um fyrirhugaða uppbyggingu þar sem fram mun koma nákvæm áætlun um verkefnið; stofnkostnaður, forgangsröðun, útfærsla og tímaáætlun,“ sagði Ingvar  Gíslason, formaður við sama tækifæri.