Mynd: epa
Athugið þessi frétt er meira en 3 mánaða gömul.
Kim Jong-un ber nú titilinn aðalritari
Kim Jong-un leiðtogi Norður-Kóreu ber ekki lengur titilinn formaður, heldur var ákveðið á yfirstandandi landsþingi Verkamannaflokksins í dag að hér eftir verði hann nefndur aðalritari.
Þetta tilkynnti ríkisfjölmiðill Norður-Kóreu fyrr í dag, en faðir núverandi leiðtoga, Kim Jong-il bar sama titil. Hann hefur frá andláti sínu 2011 verið nefndur ódauðlegur aðalritari Norður-Kóreu. Kim Il Sung, afi núverandi leiðtoga, hefur verið ódauðlegur forseti frá því hann lést 1994.
Sérfræðingar telja að tilgangur breytingarinnar nú sé að tryggja og styrkja völd Kim Jong-uns. Hann var formlega kjörinn formaður á síðasta landsþingi Verkamannaflokksins fyrir fimm árum, sem þá var talin staðfesting á stöðu hans sem leiðtoga landsins.
Kim hefur heitið því að efla kjarnorkuvopnabúr landsins en viðurkennir jafnframt að efnahagsáætlun flokksins frá 2016 hafi ekki gengið sem skyldi. Landamæri Norður-Kóreu hafa verið algerlega lokuð frá því í janúar á síðasta ári til að bægja hættunni af kórónuveirufaraldrinum frá.
