Stór og mikill fóðurprammi sökk á Reyðarfirði í nótt

Fóðurpramminn Muninn, í eigu Laxa fiskeldis, sökk á Reyðarfirði aðfaranótt 10. janúar 2021. Hér sjást björgunarmenn sigla upp að hlið varðskipsins Þórs.
 Mynd: Landhelgisgæslan
Fóðurpramminn Muninn, sem er í eigu Laxa fiskeldis, sökk á Reyðarfirði á fjórða tímanum í nótt. Enginn var um borð í prammanum og ekki er talið að öðrum sæfarendum stafi hætta af honum þar sem hann liggur á hafsbotni á um 40 metra dýpi á móts við vitann Grímu á Berunesi, ekki langt frá landi. Varðskipið Þór er á vettvangi.

Í tilkynningu frá Löxum fiskeldi segir að talsvert af sjó hafi komist í prammann í vonskuveðri í gærkvöldi og hann þá farið að halla töluvert. Hvorki eldisfiskum né kvíum hafi þó stafað hætta af og engin svartolía verið um borð, en um 10.000 lítrar af dísilolíu verið í tönkum skipsins. Varðskipið Þór var kallað til aðstoðar við björgunar- og mengunarvarnaraðgerðir og er það enn á slysstað.

Sökk um hálffjögur í nótt

Samkvæmt upplýsingum frá Landhelgisgæslunni sökk pramminn um hálffjögur í nótt. Reiknað er með að verktakar á vegum eigandans fari að kanna aðstæður og möguleika á að koma prammanum á flot þegar birta tekur, og verður Þór á vettvangi eitthvað fram eftir degi hið minnsta.

Muninn er 25 metra langur og 12 metra breiður prammi. Samkvæmt Landhelgisgæslunni er lítil hætta á að hann reki frá slysstað þar sem hann er kyrfilega festur við botninn með akkerum.

Ekki liggur fyrir hvers vegna pramminn sökk, en aðstæður eru og hafa verið leiðinlegar á slysstað; stífur vindstrengur, talsverður sjógangur og napurt frost, og hafa menn verið talsvert í því að berja ís af öðrum búnaði þar eystra í nótt.

Ævar Örn Jósepsson
Fréttastofa RÚV