Enn logar þónokkur eldur og reykur berst í átt að Esjumelum og Leirvogstunguhverfi í Mosfellsbæ. Slökkviliðið ráðleggur fólki í efri byggðum Mosfellsbæjar að loka gluggum.
Slökkvistörf hafa staðið yfir í hátt í þrjár klukkustundir og Sigurður Pétursson, varðstjóri hjá Lögreglunni á höfuðborgarsvæðinu, segir að búið sé að leggja sand og drullu yfir eldinn til þess að hindra frekari útbreiðslu. Vindáttin sé hagstæð eins og er en að hún eigi að breytast og þá sé hætta á að reykurinn berist yfir íbúabyggð.
Myndskeiðið sem fylgir fréttinni tók Bragi Valgeirsson, tökumaður RÚV.
