Athugið þessi frétt er meira en 8 mánaða gömul.

Ekkert banaslys í færeyskri umferð árið 2020

06.01.2021 - 03:23
Skjáskot úr fréttum færeyska Kringvarpsins af biðröð bíla og fólks eftir að fara í skimun vegna kórónuveirunnar. Frá Þórshöfn og Klakksvík
 Mynd: KRF - Kringvarp Færeyja
Enginn lést í umferðarslysi í Færeyjum árið 2020 samkvæmt opinberum bráðabirgðatölum umferðareftirlits þar í landi. Þetta er í annað sinn á undanförnum þremur árum sem umferðin kostar ekki mannslíf í Færeyjum.

Á hverju ári undanfarin fimmtíu ár, hefur einhver farist í umferðarslysi í Færeyjum að undanskildum þessum tveimur.

Umferðarslysum í landinu hefur ekki fækkað en fólk slasast í um þrjátíu slysum árlega að meðaltali. Fyrir fáeinum áratugum voru slík slys um það bil tvöfalt fleiri en fækkun þeirra er sögð haldast í hendur við það þegar viðmiðunarmörk áfengis í blóði ökumanna voru lækkuð.

Í skýrslu færeyska umferðareftirlitsins segir að tölurnar sanni að stöðugar umbætur í átt að auknu umferðareftirliti borgi sig. Eins kemur fram að færri hafi verið á ferðinni en í meðalári vegna kórónuveirufaraldursins en að lögregla hafi gripið tiltölulega marga fyrir of hraðan akstur.