Athugið þessi frétt er meira en 4 mánaða gömul.

Mengun víða yfir heilsuverndarmörkum á nýársdag

03.01.2021 - 13:41
Mynd með færslu
 Mynd: RÚV - Kristján Þór Ingvarsso - RÚV
Svifryk fór yfir heilsuverndarmörk á flestum mælistöðvum Umhverfisstofnunar á höfuðborgarsvæðinu á nýársdag. Það var aðeins mælistöðin á Norðurhellu í Hafnarfirði sem var undir mörkum. Hún er staðsett í iðnaðar- og athafnasvæðinu í Hellnahverfi og því utan við íbúabyggð.

Umhverfisstofnun hefur tekið saman sólarhringsmeðaltöl svifryks (PM10) fyrir mælistöðvar á höfuðborgarsvæðinu og Akureyri fyrir fyrsta dag ársins 2021. Í frétt á vef stofnunarinnar segir að ólíkt mörgum öðrum loftmengunarefnum séu ekki nein heilsuverndarmörk fyrir klukkustundargildi svifryks í reglugerð, aðeins sólarhringsgildi. Heilsuverndarmörk svifryks fyrir sólarhringsmeðaltal eru 50 µg/m3.

Mest mældist svifrykið á mælistöð við Húsdýragarðinn í Reykjavík, þar sem það var 165 µg/m3 og næstmest við Dalsmára í  Kópavogi, þar sem það var 132 µg/m3.

„Í hægviðrinu þessi áramót mátti sjá greinilega þegar líða tók á nýársnótt að flugeldamengun fylgdi landslaginu og seig niður í dældir. Þannig mátti sjá að hæstu gildin milli klukkan tvö og þrjú um nóttina voru á mælistöðvum í Laugardalnum og Kópavogsdalnum,“ segir á vef Umhverfisstofnunar.

Mynd með færslu
 Mynd: Umhverfisstofnun