Athugið þessi frétt er meira en 9 mánaða gömul.

Þór sækir vélarvana Lagarfoss

28.12.2020 - 11:16
Mynd með færslu
Þór leggur frá bryggju í morgun. Mynd: Sigurður Ásgrímsson/Landhelgi - Landhelgisgæslan
Áhöfn varðskipsins Þórs var kölluð út í gærkvöld vegna Lagarfoss, flutningaskips Eimskips, sem varð vélarvana um 230 sjómílur suðvestur af Garðskaga í gær. Búast má við að Þór verði kominn að Lagarfossi í fyrramálið. Aðstæður á staðnum eru góðar og skipverjum er engin hætta búin.

Eimskip tilkynnti Landhelgisgæslunni um bilunina um hádegisbil í gær, samkvæmt tilkynningu frá Landhelgisgæslunni, og spurðist fyrir um hvort mögulegt væri að fá Þór til að taka Lagarfoss í tog. Áhöfnin á varðskipinu var síðan kölluð út þegar ljóst var að viðgerð um borð í Lagarfossi hafði ekki borið árangur.

Þór lét úr höfn í Reykjavík á öðrum tímanum í nótt. Taug verður komið á milli skipanna þegar Þór verður kominn á áfangastað. Gert er ráð fyrir að drátturinn taki allt að tvo sólarhringa og að skipin verði komin til hafnar í Reykjavík á gamlársdag.

annalth's picture
Anna Lilja Þórisdóttir