Anton Sveinn McKee, sundmaður úr Sundfélagi Hafnarfjarðar. Anton Sveinn varð atvinnumaður á árinu þegar hann fékk samning hjá kanadíska liðinu Toronto Titans. Liðið var eitt af tólf sem kepptu í Alþjóðlegu ISL sunddeildinni, International Swimming League, í haust. Hann bætti bæði Íslands og- Norðurlandamet í 100 og 200 metra bringsundi í 25 metra laug. Að auki vann hann báðar greinar í mótum á ISL mótaröðinni. Anton Sveinn er eini Íslendingurinn sem hefur nú þegar tryggt sér keppnisrétt á Ólympíuleikunum á næsta ári.

Þetta er í annað sinn, og annað árið í röð sem Anton Sveinn McKee er meðal tíu efstu í kjörinu á íþróttamanni ársins.

Aron Pálmarsson

Aron Pálmarsson, handboltamaður hjá Barcelona á Spáni. Aron vann allt sem hægt var að vinna á Spáni með Barcelona, en liðið lék nærri 60 leiki í röð án taps í öllum mótum. Þá var Aron eini Íslendingurinn sem komst í úrslitahelgi Meistaradeildar Evrópu nú milli jóla og nýárs. Barcelona er eina taplausa liðið í riðlakeppni Meistaradeildarinnar í haust og vetur. Aron lék einnig vel á köflum með landsliðinu, einkum þegar það sigraði Dani á EM.

Þetta er í áttunda sinn sem Aron Pálmarsson er meðal tíu efstu í kjörinu. Aron hlaut nafnbótina íþróttamaður ársins árið 2012. Hann var í fyrsta sinn meðal tíu efstu árið 2010.

Bjarki Már Elísson

Bjarki Már Elísson, handboltamaður hjá Lemgo í Þýskalandi. Bjarki Már varð markakóngur efstu deildar Þýskalands í handbolta í vor þegar keppni var hætt. Hann er þriðji Íslendingurinn sem verður markakóngur í þessari sterku deild. Bjarki skoraði 216 mörk á leiktíðinni í þýsku deildinni, 14 mörkum meira en sá næstmarkahæsti. Þá skoraði Bjarki Már flest mörk íslensku landsliðsmannana á Evrópumótinu í Svíþjóð í janúar og er orðinn lykilmaður í landsliðinu.

Þetta er í fyrsta sinn sem Bjarki Már er meðal tíu efstu í kjörinu á íþróttamanni ársins.

Glódís Perla Viggósdóttir

Glódís Perla Viggósdóttir, knattspyrnukona hjá Rosengård í Svíþjóð. Glódís Perla var lykilmaður í vörn Rosengård sem endaði í öðru sæti í sænsku úrvalsdeildinni. Hún var einn besti leikmaðurinn í deildinni í ár og var tilnefnd sem besti varnarmaðurinn. Glódís var kjörin sjöundi besti leikmaður deildarinnar í vali Damallsvenska Nyheter. Þá var hún fastamaður í vörn íslenska landsliðsins sem tryggði sér á árinu sæti í lokakeppni EM.

Þetta er í annað sinn og jafnfram annað árið í röð sem Glódís Perla er meðal tíu efstu í kjörinu.

Guðni Valur Guðnason

Guðni Valur Guðnason, kringlukastari úr ÍR. Guðni Valur bætti Íslandsmetið í kringlukasti á árinu og bætti þar með 31 árs gamalt met Vésteins Hafsteinssonar. Árangurinn hefði dugað Guðna inn á Ólympíuleikana á næsta ári ef lágmarkatímabilið hefði verið opið þegar hann setti Íslandsmetið. Guðni Valur átti fimmta lengsta kast ársins í heiminum og vann um leið stigahæsta afrek Íslendings frá upphafi miðað við stigatöflu Alþjóðafrjálsíþróttasambandsins.

Þetta er í fyrsta sinn sem Guðni Valur er meðal tíu efstu í kjörinu á íþróttamanni ársins.

Gylfi Þór Sigurðsson

Gylfi Þór Sigurðsson, knattspyrnumaður hjá Everton í Englandi. Gylfi var lykilmaður í að koma Íslandi í úrslitaleik um sæti í lokakeppni EM næsta sumar, þegar hann skoraði bæði mörk Íslands í 2-1 sigri á Rúmeníu í undanúrslitum umspilsins. Gylfi fylgdi því svo eftir með marki beint úr aukaspyrnu á móti Ungverjum í úrslitaleiknum, sem þó tapaðist. Gylfi hefur á árinu spilað hluta leikja Everton í ensku úrvalsdeildinni.

Þetta er í tíunda sinn sem Gylfi Þór Sigurðsson er meðal tíu efstu í kjörinu. Gylfi hefur tvisvar hlotið sæmdarheitið íþróttamaður ársins, árin 2013 og 2016. Hann var í fyrsta sinn á meðal tíu efstu árið 2010 og svo allar götur frá 2012.

Ingibjörg Sigurðardóttir

Ingibjörg Sigurðardóttir, knattspyrnukona hjá Vålerenga í Noregi. Ingibjörg varð á árinu norskur meistari með Vålerenga. Hún var meðal markaskorara í lokaumferð deildarinnar þegar liðið tryggði sér meistaratitilinn. Í kjölfarið var hún valin besta knattspyrnukona norsku deildarinnar í ár og varð bikarmeistari með Vålerenga eftir sigur á Lilleström í framlengdum úrslitaleik. Þá átti Ingibjörg fast sæti í vörn íslenska landsliðsins sem vann sér sæti í lokakeppni EM.

Þetta er í fyrsta sinn sem Ingibjörg er meðal tíu efstu í kjörinu.

Martin Hermannsson

Martin Hermannsson, körfuboltamaður hjá Valencia á Spáni. Martin varð á árinu þýskur meistari með Alba Berlín. Hann skoraði að meðaltali 14 stig og gaf 4,5 stoðsendingar í úrslitunum. Martin varð einnig bikarmeistari með Berlínarliðinu og var valinn mikilvægasti leikmaður úrslitaleiksins. Martin samdi svo við spænska liðið Valencia í sumar og spilaði í Evrópudeildinni, Euroleague, með liðum sínum allt árið.

Þetta er í fjórða sinn sem Martin Hermannsson er meðal tíu efstu í kjörinu. Hann hafnaði í 2. sæti kjörsins í fyrra á eftir Júlían J. K. Jóhannssyni kraftlyftingamanni sem vann.

Sara Björk Gunnarsdóttir

Sara Björk Gunnarsdóttir, knattspyrnukona hjá Lyon í Frakklandi. Sara Björk varð bæði þýskur meistari og bikarmeistari með Wolfsburg á árinu. Hún gekk svo í raðir franska stórliðsins Lyon í sumar og vann Meistaradeild Evrópu með Lyon eftir að hafa lagt Wolfsburg að velli í úrslitum. Sara Björk skoraði raunar þriðja markið í úrslitaleiknum sem fór 3-1. Sara er fyrsta íslenska knattspyrnukonan til að vinna Meistaradeildina. Þá var hún fyrirliði og lykilmaður í íslenska landsliðinu sem tryggði sér sæti á EM í Englandi.

Þetta er í níunda sinn sem Sara Björk Gunnarsdóttir er meðal tíu efstu í kjörinu. Sara hlaut nafnbótina íþróttamaður ársins 2018. Hún var fyrst á topp 10 listanum árið 2011 þegar hún endaði í 4. sæti. Hún hefur svo verið samfleytt á listanum frá og með árinu 2013.

Tryggvi Snær Hlinason

Tryggvi Snær Hlinason, körfuboltamaður hjá Casademont Zaragoza á Spáni. Tryggvi Snær hefur spilað vel með liði sínu á Spáni í ár og er sá sem hefur átt flestar troðslur í deildinni. Þá er hann meðal þeirra tuttugu sem eru með hæsta framlagið að meðaltali í leik í spænsku deildinni. Tryggvi Snær var besti landsliðsmaður Íslands í körfubolta á árinu þegar horft er í tölfræði, með 17,8 stig að meðaltali í leik og 12,3 fráköst. Hann var sérlega öflugur í sigri á Slóvakíu í Laugardalshöll í febrúar þar sem hann skoraði 26 stig og tók 17 fráköst.

Þetta er í fyrsta sinn sem Tryggvi Snær Hlinason er meðal tíu efstu í kjörinu á íþróttamanni ársins.

Í fyrra var það kraftlyftingamaðurinn Júlían J. K Jóhannsson sem var kjörinn íþróttamaður ársins. Þrjú þeirra sem eru á topp tíu listanum í ár hafa áður hlotið nafnbótina. Það eru Aron Pálmarsson, Gylfi Þór Sigurðsson og Sara Björk Gunnarsdóttir. Úrslitin úr kjörinu verða kynnt í beinni útsendingu þriðjudagskvöldið 29. desember á RÚV. Útsendingin hefst klukkan 19:40.

Þrír efstu þjálfarar ársins

En það verður ekki bara tilkynnt um úrslitin í kjöri íþróttamanns ársins í beinni útsendingu 29. desember. Þar verður úrslitum í kjörinu á liði ársins og þjálfara ársins einnig kynnt.

Samtök íþróttafréttamanna hafa valið þjálfara ársins frá og með árinu 2012. Þrír efstu þjálfararnir í ár eru þessir í stafrófsröð:

Arnar Þór Viðarsson

Arnar Þór Viðarsson, knattspyrnuþjálfari 21 árs landsliðs Íslands. Undir stjórn hans vann 21 árs landsliðið sér sæti í lokakeppni Evrópumótsins á næsta ári. Þetta er aðeins í annað sinn sem Ísland kemst á stórmót í þessum aldursflokki. Íslenska liðið vann þrjá af fjórum leikjum sínum á árinu.

Þetta er í fyrsta sinn sem Arnar Þór Viðarsson er meðal þriggja efstu í kjörinu á þjálfara ársins.

Elísabet Gunnarsdóttir

Elísabet Gunnarsdóttir, knattspyrnuþjálfari hjá Kristianstad í Svíþjóð. Undir stjórn Elísabetar endaði Kristianstad í 3. sæti sænsku úrvalsdeildarinnar í ár, sem er besti árangur félagsins. Með árangrinum vann Kristianstad sér sæti í Meistaradeild Evrópu í fyrsta sinn. Þá var Elísabet valin besti þjálfari sænsku deildarinnar í annað sinn og fékk að auki heiðursverðlaun á uppskeruhátíð sænsku deildarinnar.

Þetta er í annað sinn sem Elísabet Gunnarsdóttir er meðal þriggja efstu í kjörinu á þjálfara ársins. Elísabet hafnaði í 3. sæti árið 2017.

Heimir Guðjónsson

Heimir Guðjónsson, knattspyrnuþjálfari hjá Val. Heimir gerði karlalið Vals að Íslandsmeisturum í ár. Valur var með yfirburðarstöðu þegar Íslandsmótið var blásið af vegna kórónuveirufaraldursins og á góðri leið með að slá stigametið í deildinni. Þá komst Valur einnig í undanúrslit Mjólkurbikarsins, en bikarkeppnin var ekki kláruð frekar en Íslandsmótið.

Þetta er í fyrsta sinn sem Heimir Guðjónsson er meðal þriggja efstu í kjörinu á þjálfara ársins.

Þrjú efstu lið ársins

Lið ársins verður einnig útnefnt þriðjudagskvöldið 29. desember. Samtök íþróttafréttamanna hafa kosið lið ársins frá árinu 2012. Þrjú efstu liðin í kjörinu þetta árið eru í stafrófsröð þessi:

21 árs landslið karla í knattspyrnu

21 árs landslið karla í knattspyrnu. Íslenska liðið tryggði sér á árinu sæti í lokakeppni Evrópumótsins sem hefst í Ungverjalandi og Slóveníu í mars. Þetta er aðeins í annað sinn sem Ísland kemst á stórmót í þessum aldursflokki. Íslenska liðið vann þrjá af fjórum leikjum sínum í undankeppninni á árinu.

Þetta er í fyrsta sinn sem 21 árs landslið karla í fótbolta er meðal þriggja efstu í kjörinu á liði ársins.

Kvennalið Breiðabliks í knattspyrnu

Kvennalið Breiðabliks í knattspyrnu. Blikar urðu Íslandsmeistarar á árinu eftir hreint ótrúlega byrjun í mótinu. Blikar unnu fyrstu níu leiki Pepsi Max deildarinnar og fengu raunar ekki á sig mark í öllum þessum níu leikjum, sem er met. Blikar unnu báða leikina á móti Val, sínum helstu keppinautum. Þá var Breiðablik enn með í bikarkeppninni þegar keppni var blásin af í haust.

Þetta er í fyrsta sinn sem meistaraflokkur kvenna í fótbolta hjá Breiðabliki er meðal þriggja efstu í kjörinu á liði ársins.

Kvennalandslið Íslands í knattspyrnu

Kvennalandslið Íslands í knattspyrnu. Landsliðið tryggði sér á árinu sæti í lokakeppni Evrópumótsins sem haldið verður sumarið 2022 á Englandi. Ísland spilaði fimm leiki í  undankeppni EM á árinu og vann þrjá þeirra og gerði eitt jafntefli. Jafnteflið kom á móti Svíþjóð, silfurliði síðustu Ólympíuleika og bronsliði HM. Íslenska liðið var í raun óheppið að vinna ekki þann leik. EM í Englandi verður fjórða Evrópumótið í röð sem Ísland kemst inn á.

Kvennalandslið Íslands í fótbolta hefur tvisvar áður verið meðal þriggja efstu í kjörinu á liði ársins. Árin 2013 og 2016 hafnaði liðið í 2. sæti kjörsins.