Mynd: Almannavarnir
Athugið þessi frétt er meira en 6 mánaða gömul.
„Vísbendingar um að faraldurinn gæti verið á uppleið“
Þórólfur Guðnason, sóttvarnalæknir, segir vísbendingar um að faraldurinn sé á uppleið á ný. 13 greindust með innanlandssmit í gær, þar af voru fimm utan sóttkvíar. Þetta eru jafn mörg smit og í gær. Þórólfur segir þetta mörg smit, ekki síst í ljósi þess að mun færri sýni voru tekin í gær en daginn áður.
„Og svo er hlutfall úr einkenna-sýnatöku að hækka, það var komið langt undir eitt prósent en er núna milli eitt og tvö prósent. Þannig að það eru vísbendingar um að þetta sé að uppleið.“
Þórólfur segir hins vegar að flestir sem hafi greinst utan sóttkvíar hafi tengsl við aðra smitaða en ekki náðst á sínum tíma. „Þannig að það eru ákveðnar vísbendingar um að þetta gæti verið á uppleið og það er bara miður ef svo er.“
Smitin tengjast sem fyrr hópmyndun, vinir að hittast og partýstand. „Og svo því miður erum við enn að sjá fólk með einkenni sem er ekki að fara í sýnatöku eða halda sig til hlés og smita þannig aðra.“ Enn og aftur þurfi því að ítreka að ef fólk finni fyrir minnstu einkennum að fara í sýnatöku.
Þórólfur segir augljóst að fólk sé mikið á ferðinni út um allt og það auki líkur á útsetningu á smiti. „Það eru flestir sem fara eftir leiðbeiningum þá er alltaf einhver sem gerir það ekki og heldur þessu gangandi þannig.“
