Athugið þessi frétt er meira en 1 ára gömul.

Rósa Björk verður þingmaður Samfylkingarinnar

16.12.2020 - 17:55
Mynd með færslu
 Mynd: RÚV
Rósa Björk Brynjólfsdóttir alþingismaður hefur gengið til liðs við Samfylkinguna.

Hætt í Vinstri grænum

Rósa Björk var kosin á þing fyrir Vinstri græn í síðustu alþingiskosningum. Hún studdi ekki ríkisstjórn Vinstri grænna, Sjálfstæðisflokksins og Framsóknarflokksins. Hún var þó áfram þingmaður Vinstri grænna.

Í september hætti Rósa Björk í Vinstri grænum. Hún hefur verið óháður þingmaður síðan, það er að hún hefur ekki verið í neinum stjórnmálaflokki.

Gengur í Samfylkinguna

Rósa Björk gekk í Samfylkinguna í dag. Hún sat fyrsta fundinn í þingflokki Samfylkingarinnar í dag.

Samfylkingin hefur nú átta þingmenn. Þá eru nú 33 þingmenn í meiri hluta, sem fylgir ríkisstjórninnni. 30 þingmenn eru í stjórnarandstöðu.

Yfirlýsing frá Rósu Björk

Rósa Björk sendi frá sér þessa yfirlýsingu:

„Í dag gekk ég til liðs við þingflokk Samfylkingarinnar en ég hef verið óháður þingmaður á Alþingi síðastliðna 3 mánuði. Pólitískar áherslur mínar og Samfylkingarinnar eru nátengdar með mikilvægi á aukinn jöfnuð í samfélaginu þar sem allir geta notið sín á eigin forsendum, burtséð frá stétt eða stöðu en líka á frið og sjálfbærni og opið, framsækið og fjölbreytt samfélag með áherslu á virka fjölþætta utanríkisstefnu. Að undanförnu hefur Samfylkingin að auki lagt mun meiri og skýrari þunga á loftlagsmálin, og umhverfismálin en áður og lagt fram góða áætlun um græna viðspyrnu út úr COVID-19 kreppunni. Það gerir útslagið fyrir mig þegar kemur að því að taka þessa ákvörðun um að ganga í Samfylkinguna og þingflokk hennar. Ég hlakka mjög mikið til að taka þátt í starfi Samfylkingarinnar og að leggja mitt á vogarskálarnar til að bæta íslenskt samfélag.“

 

annathr's picture
Anna Sigríður Þráinsdóttir
málfarsráðunautur