Athugið þessi frétt er meira en 9 mánaða gömul.

Vilja að ríkið og Seðlabankinn styðji sveitarfélögin

Mynd með færslu
 Mynd: Anton Brink - Ruv.is
Samband íslenskra sveitarfélaga og stjórnendur stærstu sveitarfélaga landsins fara fram á að Seðlabankinn og ríkissjóður aðstoði sveitarfélögin við að leysa úr fjárhagsvanda þeirra. Þann vanda megi enda að miklu leyti rekja til vanfjármögnunar í ákveðnum málaflokkum, sem færðir hafa verið til sveitarfélaganna frá ríkinu á síðustu árum. Frá þessu er greint í Markaðinum, viðskiptakálfi Fréttablaðsins í dag.

 

Samkvæmt frétt blaðsins hafa sveitarfélögin átt í óformlegum viðræðum við Seðlabankann um að hann hlaupi undir bagga með þeim með kaupum á útistandandi skuldabréfum. Eigendur þeirra skuldabréfa sem Seðlabankinn keypti gætu síðan notað afrakstur sölunnar til að kaupa nýja skuldabréfaflokka af sveitarfélögunum.

Einnig er stungið upp á þeim möguleika að Seðlabankinn keypti nýja skuldabréfaflokka beint af sveitarfélgöunum, og sú þriðja fælist í því að Seðlabankinn keypti upp hluta af útgáfu Lánasjóðs sveitarfélaga, annað hvort beint af sjóðnum eða á markaði.

Ríki og seðlabankar „víðs vegar um heim“ styðja borgir og sveitarfélög

Haft er eftir Degi B. Eggertssyni borgarstjóra að fulltrúar sveitarfélaganna hafi bent Seðlabankafólki á að ríkisstjórnir og seðlabankar hafi „verið að styðja mun ákveðnar við sveitarfélög og borgir víðs vegar um heim,“ svo sem í Bandaríkjunum og Svíþjóð, þar sem seðlabankar hafi verið að kaupa skuldabréf sveitarfélaga.

Þá segir Rósa Guðbjartsdóttir, bæjarstjóri Hafnarfjarðar, að Seðlabankinn eða ríkissjóður eigi að tryggja sveitarfélögum landsins sambærileg lánakjör og ríkið nýtur, „til dæmis með því að kaupa núverandi útgáfur þeirra sveitarfélaga sem eru með skuldabréf á markaði.“

 

Ævar Örn Jósepsson
Fréttastofa RÚV