Athugið þessi frétt er meira en 4 mánaða gömul.

Gagnrýna breytingar á lögum um ofanflóðavarnir

default
 Mynd: Gunnlaugur Starri Gylfason - RÚV
Bæjarráð Fjallabyggðar telur að fyrirhugaðar breytingar á lögum um ofanflóðavarnir geti fært tug- eða hundruð milljóna skuldbindingar yfir á sveitarfélögin frá ríkinu. Ekki komi til greina að samþykkja frumvarp að lögum eins og það liggur fyrir á Alþingi.

Bæjarráð Fjallabyggðar bókaði á fundi sínum morgun umsögn um frumvarp að lögum þar sem til stendur að gera breytingar á núverandi lögum um varnir gegn snjóflóðum og skriðuföllum nr. 49/1997.

Sveitarfélögin sitji uppi með tjón af snjóflóðahættu

Meðal annars telur bæjarráðið að þegar kostnaður við eftirlit með snjóflóðahættu verði færður yfir til skíðasvæðanna sé hætt við að hagsmunum þeirra verði ekki gætt sem skildi þegar kemur að almannavörnum sökum hættu á ofanflóðum. Þá sé hætta á því, ef skíðasvæði eða önnur mannvirki lendi inn á snjólfóðahættusvæði, að sveitarfélögin sitji uppi með það tjón sem af því verður.

Miklar fjárskuldbindingar færist yfir á sveitarfélögin

Þá óttast Fjallabyggð að tug- ef ekki hundruð milljóna króna skuldbindingar verði færðar yfir á sveitarfélögin af ríkinu, því í frumvarpinu sé gert ráð fyrir að sveitarfélög verði eigandi varnarmannvirkja og beri ábyrgð á viðhaldi þeirra. „Í mínum huga er algerlega skýrt að það er verið að færa ábyrgðina yfir. Ofan á það þá skil ég ekki hvernig menn ætla að gera þetta. Hvernig ætla menn að setja öll þessi snjóflóðamennvirki inn í efnahagsreikning sveitarfélaga til dæmis,“ segir Elías Pétursson, bæjarstjóri í Fjallabyggð.

Óljóst hvort tryggður verði aðgangur að fjármunum

Þá segir hann mjög óljóst hvort peningar, sem ríkið innheimtir í formi skattgreiðslna vegna ofanflóðavarna, fari í viðhald eða framkvæmdir við varnarmannvirki, eða sveitarfélögunum verði tryggður aðgangur að þessu fjármagni. „Þegar er orðið skýrt að sveitarfélögin eigi eitthvað og beri ábyrgð á því, að þá sé aðeins minni pressa að láta sveitarfélögin hafa pening. Versus það er ríkið bara hreinlega á þessi almannavarnarmannvirki og ber kostað af því, bæði að viðhalda þeim og gera þau,“ segir Elías.