Athugið þessi frétt er meira en 8 mánaða gömul.

Palestínskur unglingur skotinn til bana á Vesturbakka

04.12.2020 - 23:37
epa08861926 A Palestinian protester reacts as he lies on the ground after he was reportedly hit by an Israeli Army vehicle during clashes that erupted following a demonstration against the expansion of settlements in the-West Bank town of Salfit, near the Israeli settlement of Ariel, 04 December 2020. According to reports, five Palestinians were wounded and two others arrested.  EPA-EFE/ALAA BADARNEH
 Mynd: EPA-EFE - EPA
Þrettán ára palestínskur unglingur var skotinn til bana í þorpinu Mughayir norður af Ramallah á vesturbakkanum í dag. Ali Ayman Nasr Abu Aliya varð fyrir byssukúlum ísraelskra hermanna meðan á mótmælum gegn landnámi Ísraela stóð.

Hann var fluttur á sjúkrahús í Ramallah þar sem hann lést af sárum sínum. Nickolay Mladenov sendifulltrúi Sameinuðu þjóðanna í Miðausturlöndum skrifaði á Twitter að hann hryllti við því sem gerst hefði og að Ísraelsstjórn bæri skylda til að rannsaka málið.

Frá palestínska utanríkisráðuneytinu barst yfirlýsing um að það hyggðist kæra Ísraela til Alþjóðaglæpadómstólsins. Fjórir aðrir særðust í mótmælunum.

Talsmaður ísraelska hersins segir mótmælendur hafa kastað steinum að öryggissveitum og kveikt hafi verið í dekkjum sem hafi ógnað öryggi almennings.

Yfir 2,8 milljónir Palestínumanna búa á Vesturbakkanum auk 450 þúsund Ísraela en Ísrael hernam svæðið árið 1967.