Athugið þessi frétt er meira en 3 mánaða gömul.

Byggja nýtt hjúkrunarheimili fyrir 60 manns á Akureyri

03.12.2020 - 13:59
Mynd með færslu
 Mynd: Óðinn Svan Óðinsson - RÚV
Nýtt hjúkrunarheimili fyrir 60 manns verður byggt í Glerárhverfi á Akureyri og tekið í notkun í loks árs 2023. Þar með verða hjúkrunarrými í bænum rúmlega 230 en þau eru núna um 170. Áætlaður heildarkostnaður við framkvæmdina er um þrír milljarðar sem skiptist þannig að 85% greiðast úr ríkissjóði en Akureyrarbær greiðir 15%.

Fyrirsjáanleg þörf á Akureyri

Svandís Svavarsdóttir, heilbrigðisráðherra og Ásthildur Sturludóttir, bæjarstjóri Akureyrarbæjar hafa þegar undirritað samning um bygginguna. Samkvæmt mati heilbrigðisráðuneytisins er skortur á hjúkrunarrýmum á Akureyri og fyrirsjáanlegt að þörf fyrir fleiri rými aukist hratt á næstu árum. 

„Fátt ánægjulegra en að sjá stór skref stigin“

„Það er afskaplega gleðilegt að samstarf ráðuneytisins og Akureyrarbæjar um þetta mikilvæga verkefni liggi nú fyrir skjalfest með samningi. Það er fátt ánægjulegra en að sjá stór skref stigin í átt að aukinni og bættri þjónustu við aldraða. Akureyrarbær hefur sinnt þeim málum afar vel, bæði við aldraða heima og á hjúkrunarheimilum og ég veit að svo mun verða áfram,“ segir Svandís Svavarsdóttir heilbrigðisráðherra í tilkynningunni.

Meiri hagkvæmni og styttri framkvæmdatími með alútboði

Í tilkynningunni segir að farið verði í framkvæmdina á grundvelli alútboðs þar sem reynslan sýni að sú leið geti stytt framkvæmdatíma og leitt til meiri hagkvæmni. Sú aðferð felur í sér að þeir sem vilja vinna verkið bjóða í skilgreinda heildarupphæð þar sem jafnframt liggur fyrir ýtarleg þarfalýsing sem þarf að uppfylla.