Athugið þessi frétt er meira en 7 mánaða gömul.

Jónatan Garðars heiðraður á degi íslenskrar tónlistar

Mynd: RÚV / RÚV

Jónatan Garðars heiðraður á degi íslenskrar tónlistar

01.12.2020 - 13:50

Höfundar

Jónatan Garðarsson fjölmiðlamaður fær Heiðursverðlaun á degi íslenskrar tónlistar. Fær hann verðlaunin fyrir framúrskarandi störf í þágu íslenskrar tónlistar í gegnum tíðina. Sinfóníuhljómsveit Norðurlands hlýtur hvatningarverðlaun.

Dagur íslenskrar tónlistar 2020 var haldinn hátíðlegur fyrr í dag, þriðjudaginn 1. desember og af því tilefni var boðað til dagskrár í Iðnó við Reykjavíkurtjörn. Velunnurum íslenskrar tónlistar voru þar veittar viðurkenningar fyrir framúrskarandi umfjöllun og stuðning við íslenska tónlist og loks voru fluttar þrjár íslenskar dægurperlur sem voru í forgrunni fyrir þennan dag.

Jónatan fær lítinn fugl

Jónatan Garðarsson fjölmiðlamaður fékk Heiðursverðlaun Dags íslenskrar tónlistar sem kennd eru við Lítinn fugl. Viðurkenninguna fær Jónatan fyrir framúrskarandi störf í þágu íslenskrar tónlistar í gegnum tíðina, meðal annars fyrir vandaða og metnaðarfulla dagskrárgerð í útvarpi og sjónvarpi. Jónatan hóf að skrifa um popptónlist í dagblöð árið 1977 og um líkt leyti byrjaði hann að gera útvarpsþætti um tónlist. Seinna bættist sjónvarps- og heimildarþáttagerð við. Hann var einn af stofnendum Jazzvakningar og formaður þess félags á upphafsárunum. Hann vann við hljómplötuútgáfu frá 1978 til 1987 og var formaður Sambands flytjenda og hljómplötuframleiðenda lengi vel. Jónatan hefur gegnt formennsku hjá Tónlistarsjóði og verið framkvæmdastjóri Félags íslenskra hljómplötuútgefenda.

Jónatan hefur komið að íslenskri tónlist á margvíslegan hátt í rúma fjóra áratugi. Hann var lengi fararstjóri íslenska Eurovision hópsins, skrifað fjölmargar greinar um tónlistarmenn, hljómplötur og íslenskt tónlistarlíf, komið að bókarskrifum um íslenska tónlist, kennt rokksögu í Tónlistarskóla FÍH og Menntaskóla í tónlist og haldið fyrirlestra um íslenska tónlist um árabil. Hann tók þátt í að setja Rokksafn Íslands á laggirnar og skrifaði allan texta safnsins. Undanfarin ár hefur hann starfað hjá Ríkisútvarpinu meðal annars við þáttagerð.

Sinfóníuhljómsveit Norðurlands fær hvatningarverðlaun

Auk heiðursverðlaunanna fengu Sinfóníuhljómsveit Norðurlands sérstök hvatningarverðlaun fyrir öfluga og metnaðarfulla dagskrá undanfarin ár, meðal annars kvikmyndartónlistarverkefnið SinfoniaNord. Það voru stofnendur SinfoNord verkefnisins, tónskáldin Þorvaldur Bjarni Þorvaldsson og Atli Örvarsson sem veittu viðurkenningunni viðtöku.

Fyrir aukna innlenda dagskrárgerð, miðlun tónlistar í samkomubanni og atfylgi við íslenska tónlist í sjónvarpi hlaut Sjónvarp Símans viðurkenninguna Gluggann. Það var dagskrárstjóri Sjónvarps Símans, Pálmi Guðmundsson sem tók við viðurkenningunni.

Loks hlaut Íslenska Bylgjan, nýsköpunarverðlaun Dags íslenskrar tónlistar en þessi nýtilkomna útvarpsstöð leikur eingöngu íslenska tónlist og virkar sem mikil hvatning til íslensks tónlistarfólks. Ósk Gunnarsdóttir dagskrárstjóri tók við viðurkenningunni.

Innsendingargjöld felld niður á íslensku tónlistarverðlaununum

Kristján Freyr Halldórsson, tónlistarmaður og framkvæmdastjóri Dags íslenskrar tónlistar og íslensku tónlistarverðlaunanna, tilkynnti við þetta tilefni að  Íslensku tónlistarverðlaunin og símafyrirtækið Nova hefðu hafið samstarf um tónlistarverðlaunin 2021 sem haldin verða í mars. Í kjölfar samstarfsins hefur verið ákveðið að fella niður öll gjöld vegna innsendinga verka og með því leggja ÍSTÓN og Nova áherslu á að styðja beint við íslenskt tónlistarfólk og hvetja þau áfram til dáða.

Tengdar fréttir

Tónlist

Gerður Bjarklind verðlaunuð á Degi íslenskrar tónlistar

Tónlist

Pétur Grétarsson hlýtur „Lítinn fugl“

Tónlist

Jón Ólafsson verðlaunaður