Athugið þessi frétt er meira en mánaðargömul.

Serbar og Svartfellingar reka sendiherra úr landi

29.11.2020 - 00:31
epa08635572 Montenegrian President and leader of the Democratic Party of Socialists (DPS) Milo Djukanovic is interviewed outside a polling station in Podgorica, Montenegro, 30 August 2020. Montenegrian voters are choosing their representatives in the 81-seat National Assembly.  EPA-EFE/BORIS PEJOVIC
Milo Djukanovic, forseti Svartfjallalands Mynd: epa
Deilur Serba og Svartfellinga hörðnuðu í dag þegar utanríkisráðuneyti Svartfjallalands vísaði sendiherra Serbíu úr landi og Serbar svöruðu í sömu mynt. Þessi diplómatíska senna er nýjasta vendingin í langtímaþrætum nágrannaríkjanna, sem áður voru bæði hluti af Júgóslavíu. Aðeins eru nokkrir dagar þar til ný ríkisstjórn tekur við í Svartfjallalandi, sem er mun hliðhollari Serbum en núverandi stjórn.

Í tilkynningu utanríkisráðuneytisins í Podgorica segir að brottvísun serbneska sendiherrans sé afleiðing „langvinnra og viðvarandi afskipta [Serba] af innanríkismálefnum Svartfjallalands. Nokkrum klukkustundum síðar tilkynntu stjórnvöld í Belgrað að þau hefðu svarað í sömu mynt og að sendiherra Svartfjallalands væri ekki lengur velkominn í Serbíu.

Klofin þjóð

Svartfellingar hafa löngum skipað sér í tvær fylkingar varðandi afstöðuna til sinna fornu félaga Serba og Rússa annars vegar, og svo Vestur-Evrópu, Evrópusambandsins og Nató hins vegar. Núverandi ríkisstjórn Lýðræðislega sósíalistaflokksins, með forsetann Milo Djukanović í brúnni, hefur verið meira og minna við stjórnvölinn í landinu síðustu áratugi og hallað sér æ meira til vesturs.

2017 fékk landið aðild að Nató, sem litið er á sem mikilvægt skref í áttina að Evrópusambandsaðild, sem er eitt helsta markmið stjórnarinnar.

Í kosningum í ágúst í sumar gerðist það hins vegar að Lýðræðisfylkingin, sem vill aukna samvinnu við Serba og Rússa, vann góðan sigur og er í þann mund að mynda meirihlutastjórn með flokkum á svipaðri línu. Ætla má að samskipti Svartfjallalans og Serbíu batni eftir stjórnarskiptin, en framtíð Evrópusambandsaðildar Svartfellinga verði öllu óvissari. 

 

Ævar Örn Jósepsson
Fréttastofa RÚV