Sinfó og Daníel tilnefnd til Grammy-verðlauna

Mynd með færslu
 Mynd: Sinfó

Sinfó og Daníel tilnefnd til Grammy-verðlauna

24.11.2020 - 19:31

Höfundar

Hljómdiskur Sinfóníuhljómsveitar Íslands, Concurrence, hefur verið tilnefndur til Grammy-verðlauna í flokknum Besti hljómsveitarflutningur. Á disknum eru flutt ný verk eftir fjögur íslensk tónskáld og valdi The New York Times hann eina af athyglisverðustu klassísku útgáfum ársins 2019 og bandaríska útvarpsstöðin NPR valdi hann sömuleiðis einn af tíu bestu útgáfum ársins.

Í tilkynningu frá Sinfóníuhljómsveitinni segir að á disknum séu ný verk eftir fjögur íslensk tónskáld, undir stjórn Daníels Bjarnasonar, þau Önnu Þorvaldsdóttur, Hauk Tómasson, Maríu Huld Markan Sigfúsdóttur og Pál Ragnar Pálsson. 

Einleikarar með hljómsveitinni eru Sæunn Þorsteinsdóttir og Víkingur Heiðar Ólafsson. Diskurinn er annar í röðinni af þremur í samstarfi Sinfóníuhljómsveitar Íslands og bandarísku útgáfunnar Sono Luminus, þar sem hljómsveitin flytur alls 14 ný íslensk hljómsveitarverk undir stjórn Daníels Bjarnasonar. Lokadiskur þeirrar útgáfuraðar, Occurrence, er væntanlegur í janúar 2021.  

Fimm hljómdiskar eru tilnefndir til Grammy-verðlauna í þessum flokki, og meðal annarra tilnefninga má nefna Fílharmóníusveitina í Los Angeles og Sinfóníuhljómsveitina í San Francisco.  

Sinfóníuhljómsveit Íslands hefur einu sinni áður verið tilnefnd til Grammy-verðlauna fyrir besta hljómsveitarflutning. Það var árið 2009.