Mynd: EPA-EFE - COSTFOTO
Athugið þessi frétt er meira en 2 ára gömul.
Kínverskt far á leið til Tunglsins
Kínverjar sendu ómannað geimfar af stað til tunglsins í morgun. Tilgangurinn ferðarinnar er að safna yfirborðssýnum, sem yrði í fyrsta skipti í fjóra áratugi. Ætlunin er að nýta sýnin til að komast á snoðir um uppruna tunglsins, hvernig það varð til og að rannsaka eldvirkni á yfirborði þess.
Kínverjar verða þá þriðja ríki heims til að sækja sýni til tunglsins en Bandaríkjamenn og Sovétmenn kepptust um að sækja þennan næsta nágranna jarðar heim á sjöunda og áttunda ártug síðustu aldar.
Búist er við að geimfarið lendi á Stormhafinu svokallaða síðar í mánuðinum og hafist þar við í einn tungldag eða sem nemur fjórtán jarðardögum. Farið er búið hátæknilegum búnaði sem á að tryggja góðan árangur við söfnun sýnanna.
Kínversk stjórnvöld hafa varið milljörðum í uppbyggingu geimferðaáætlunar sinnar sem herinn hefur haft yfirumsjón með. Þeir fyrirhuga að koma á loft mannaðri geimstöð fyrir árið 2022 og að ætla að senda menn til tunglsins skömmu síðar.
