Mynd: Gunnlaugur Starri Gylfason - RÚV/Landinn
Athugið þessi frétt er meira en 8 mánaða gömul.
Ítreka að Norlandair uppfylli skilyrði um flugþjónustu
Vegagerðin ítrekar að flugvélar Norlandair, sem fyrirhugað er að taki við flugþjónustu við Bíldudal og Gjögur, uppfylli þau skilyrði sem sett voru þegar flugþjónusta til þessara staða var boðin út. Kærunefnd útboðsmála hafi staðfest að ekki var farið gegn lögum þegar samið var við Norlandair um flugið.
Í fréttum í gær var greint frá því að hreppsnefnd Árneshrepps væri ósátt við að Vegagerðin hafi gengið til samninga við flugfélagið Norlandair fremur en Erni um flugþjónustu í hreppinn. Eva Sigurbjörnsdóttir, oddviti Árneshrepps, viðraði þá sögusagnir um að Norlandair ætti ekki vélar sem stæðust nútímakröfur og því væri hætt við að flugþjónusta yrði lakari.
Þessu höfnuðu Vegagerðin og Norlandair í yfirlýsingu í gær. Friðrik Adolfsson framkvæmdastjóri Norlandair sagði meðal annars að félagið ætlaði sér að nota yngri flugvélar til Bíldudals og Gjögurs en Ernir. Þá benti hann á að fyrirtækið hefði þjónustað aðra áfangastaði eins og Vopnafjörð og Grímsey farsællega í áratugi.
Ernir bauð best til Hafnar
Vegagerðin fer nánar yfir útboðið á heimasíðu sinni í dag, en flug til Bíldudals og Gjögurs var boðið út saman en flugleiðin til Hafnar í Hornafirði sér. Þar er tekið fram að Ríkiskaup hafi talið rétt að semja við Norlandair eftir að hafa metið það sem svo að tilboð Ernis uppfyllti ekki skilyrði útboðsins og væri því ógilt.
Vegagerðin hafi hins vegar boðið Erni að leggja fram viðbótargögn, og að því loknu var tilboð félagsins metið gilt. Því hafi Erni verið boðinn samningur um flug til Hafnar, þar sem það bauð lægst, en Norlandair bauð lægst í flug til Bíldudals og Gjögurs.
Vegagerðin birtir tilboð þeirra þriggja flugfélaga sem bárust í flug til Gjögurs og Bíldudals. Þriðja flugfélagið, Flugfélag Austurlands ehf. kom hins vegar ekki til greina þar sem það stóðst ekki útboðskröfur.
Áætlunarflug til Gjögurs:
- Flugfélag Austurlands ehf. 88,1 milljón.
- Flugfélagið Ernir ehf. 197 milljónir.
- NorlandAir ehf. 139,4 milljónir.
Áætlunarflug til Bíldudals:
- Flugfélag Austurlands ehf. 303,5 milljónir.
- Flugfélagið Ernir ehf. 600,5 milljónir.
- NorlandAir ehf. 472,6 milljónir.
Áætlunarflug til Hafnar:
- Flugfélag Austurlands ehf. 370,2 milljónir.
- Flugfélagið Ernir ehf. 530,7 milljónir.
- NorlandAir ehf. 677,4 milljónir.
