Mynd:
Athugið þessi frétt er meira en 4 mánaða gömul.
Að mestu óbreyttar heimsóknarreglur á hjúkrunarheimilum
Hjúkrunarheimilið Mörk í Reykjavík hefur ákveðið að létta á ströngum heimsóknarreglum sem gilt hafa frá 7. október. Að sögn Ragnhildar Hjartardóttur hjúkrunarframkvæmdastjóra var þá eingöngu leyft að heimsækja heimilismann sem kominn var að lífslokameðferð eða veiktist skyndilega og alvarlega.
Enginn úr hópi heimilis- og starfsfólks á Mörk reyndist smitaður af Covid-19 við skimun á sunnudag. Nú má hver heimilismaður fá einn gest, alltaf þann sama, tvisvar í viku.
Heimsóknartíminn er skipulagður fyrirfram og gestir þurfa að gæta ítrustu sóttvarna og vera í eins konar sjálfskipaðri sóttkví. Á vef hjúkrunarheimilisins kemur fram að heimilismaðurinn þar sem smitaður var sé á batavegi.
Á Skjóli og Sunnuhlíð í Kópavogi gilda áfram þær reglur að hver íbúi megi fá tvær heimsóknir náins aðstandanda í viku, klukkustund í senn. Stefnt er að því að taka upp sömu reglur á dvalar- og hjúkrunarheimilinu Grund í næstu viku. Á hjúkrunarheimilinu Sóltúni er enn unnið eftir neyðarstigi. Þar þarf að panta heimsókn veikist íbúi skyndilega eða er á lífslokameðferð.
Fólki sem dvalið hefur á höfuðborgarsvæðinu síðustu tvær vikur er ekki heimilt að heimsækja hjúkrunarheimili Heilbrigðisstofnunar Austurlands, nema með sérstöku leyfi. Annars má hver íbúi fá einn gest í eina heimsókn á dag, með sérstökum undantekningum.
