Veitingarnar

Það má búast við nokkuð langri nótt og því er bráðnauðsynlegt að hafa eitthvað gott að borða. Kosningavaka í Bandaríkjunum er kjörið tækifæri til að gerast sannur „föðurlandsvinur“ eins og Bandaríkjamönnum er tíðrætt um. Þó ekki fyrir þitt eigið föðurland, heldur er gaman að prófa sig áfram með þann mat sem nýtur vinsælda í Bandaríkjunum í dag.

Kosninganótt er ekki ósvipaður sjónvarpsviðburður og SuperBowl svo sterkir vængir (hvort sem þeir eru gerðir úr kjúklingi eða blómkáli), litlir maískólfar, eða ostborgarar koma sterkir inn. Þá er ekki úr vegi að heiðra menningu allra þeirra Bandaríkjamanna sem Donald Trump úthúðaði fyrir síðustu kosningar, og ætlaði að láta byggja vegg til að koma í veg fyrir að myndi fjölga, og bjóða upp á mexíkóska veislu.

Tæplega sautján prósent bandarísku þjóðarinnar eru af rómönskum uppruna og fólk ættað frá Mexíkó, sem er langstærsti hópurinn, hefur eðli málsins samkvæmt litað matarmenningu Bandaríkjanna ríkulega. Í samræmi við þetta er kvöldið í kvöld tilvalið fyrir quesadillas, nachos, hvaða tegund sem er af tacos og sparið ekki jalapeño piparinn. Þeir sem eru í sérstaklega góðu skapi geta fengið sér Margarítu, og nei, við erum ekki að tala um pizzuna. 

Afþreyingin í fyrirrúmi

Eins og á öllum kosningavökum er viðbúið að það þurfi að bíða. Niðurstöðurnar skýra sig alls ekki sjálfar og allt tekur þetta tíma. Þá er gott að vera með hina ýmsu skemmtun reiðubúna til að stytta sér stundirnar. 

Til að byrja með mælum við að sjálfsögðu með spilinu Monopoly en það hefur Trump spilað alla sína ævi og þótt einkar lunkinn við. Árið 1989 gaf Donald svo út spil í sínu nafni sem minnti á hið klassíska Monopoly. Spilið byggði á ferli Trump en markmið þess var að sjálfsögðu að kaupa og selja eignir og knésetja andstæðinginn með peningum. 

Viðtökur spilsins voru reyndar ekki eins og búist var við, en 800 þúsund eintök seldust. Þá var spilið endurútgefið eftir að Trump hafði slegið í gegn í raunveruleikaþáttunum The Apprentice. 

Það er jafnframt gott að vera reiðubúinn með lagalista til að grípa í þegar biðin dregst á langinn. Þessi lagalisti frá Spotify er ágætur til að byggja á fyrir alvöru karlakarla-rokk sem er svo einkennandi fyrir ákveðinn kima bandarískrar tónlistar. 

Á frétta- og afþreyingarvefnum Buzzfeed má jafnframt finna ótal spurningaleiki og persónuleikapróf sem byggja á frambjóðendunum tveiur, kosningunum og sérstaklega sitjandi forseta. Það er hreint út sagt hægt að gleyma sér í misgáfulegum spurningaleikjum af þessu tagi á meðan beðið er eftir tölum úr hinum ýmsu fylkjum Bandaríkjanna. 

Hér er til dæmis eitt. 

Á spurningasíðunni Sporcle er ógrynni af prófum um sögu forsetaembættisins og sögu Bandaríkjanna sem virkilega reyna á þekkingu þeirra sem þau þreyta. Við mælum með að velja sér eitt og reyna að svara eftir bestu getu án þess að nota Google. 

Svo má líka bara standa aðeins upp og hrista á sér bossann við bossinn, sjálfan Bruce Springsteen. Það kemst enginn í hálfkvisti við hann, er það nokkuð?