MAMMÚT – Ride the Fire

Mynd: Saga Sig / Ride the Fire

MAMMÚT – Ride the Fire

02.11.2020 - 15:25

Höfundar

Hljómsveitin Mammút gaf út Ride the Fire núna í lok október. Það er fimmta plata sveitarinnar sem hefur starfað frá 2003. Síðasta plata Mammút, Kinder Version, kom út fyrir þremur árum og gekk mjög vel. Hún hlaut mikið lof tónlistarunnenda og sex tilnefningar til Íslensku tónlistarverðlaunanna þannig að spenna tónlistaráhugafólks er væntanlega mikil fyrir Ride the Fire.

Katrína Mogensen, Alexandra Baldursdóttir og Arnar Pétursson stofnuðu MAMMÚT sem unglingar árið 2003 og fljótlega bættist Ása Dýradóttir í hópinn. Trommuleikarinn Valgeir Skorri Vernharðsson hefur nú gengið til liðs við hljómsveitina og þreytir frumraun sína sem liðsmaður MAMMÚT á Ride the Fire en tilfinningaríkur og hljómmikill trommuleikur hans passar vel við leitandi hljóðheim sveitarinnar.  

Ride The Fire er fyrsta útgáfa hljómsveitarinnar frá því að platan Kinder Versions kom út árið 2017. Sú var tilnefnd til sex verðlauna á Íslensku tónlistarverðlaununum það árið og hlaut þrenn.

Ride The Fire var tekin upp á Íslandi og í London. Árni Hjörvar, bassaleikari The Vaccines og náinn vinur og samstarfsmaður hljómsveitarinnar, sá um upptökustjórn. Sam Slater hljóðblandaði plötuna. Hann hefur meðal annars unnið með Hildi Guðnadóttir og stýrt upptökum á tónlistinni fyrir kvikmyndina Joker og þættina um Chernobyl. Mandy Parnell, sem hefur meðal annars unnið með Björk og Sigur Rós, sá síðan um hljóðjöfnun. 

Það kveður að mörgu leyti við nýjan tón hjá MAMMÚT á Ride The Fire. Platan var tekin upp í sumar og haust og er þetta í fyrsta sinn sem hljómsveitin tekur upp plötu í tveimur löndum. Þetta óhefðbundna upptökuferli leiddi til þess að þau unnu að lagahlutum hvert í sínu lagi í stað þess að vera öll í sama herberginu. Ferlið skapaði þó ekki fjarlægð á milli hljómsveitarmeðlima heldur þvert á móti styrkti það traustið á milli þeirra og gaf þeim meira frelsi og vald til þess að spinna og umbreyta jafnvel lagasmíðum hvert annars. „Það var gagnkvæm virðing og frelsi í þessari vegferð“ segir Ása. „Allar hugmyndir voru velkomnar. Þetta varð að hálfgerðri rannsóknarvinnu. Við lærðum að þekkja okkur betur sem hópur.“ 

Lagið Sun and Me var fyrsta lagið sem hljómsveitin samdi fyrir Ride the Fire og Katrína Mogensen, söngkona sveitarinnar, lýsir sköpun þess sem brú frá Kinder Versions yfir í nýju plötuna og bætir við, „þetta er samtal við sólina. Textinn er tilraun til að fanga ofsafengna krafta hennar.“

Lögin á Ride The Fire eru sérstaklega myndræn og út frá þeim heimi skapaði hljómsveitin persónur sem fylgja plötunni og eru hluti af sjónrænni umgjörð hennar. Ása lýsir þessu sem eins konar aðferð til að búa til strúktúr úr sköpunarverki þeirra. Það mætti jafnvel líkja þessum persónulega sagnaheimi við trúarbrögð en hann er engu að síður glettinn í grunninn og er leikgleðin einmitt mikilvægt þema á plötunni. „Stjörnuspeki og trúarbrögð eru leið fyrir fullorðna til að leika sér og búa til nýtt myndmál. Við vorum mikið að hugsa um galdrana í því að búa til eigin sögur.“ 

Ride The Fire er plata vikunnar á Rás 2 og Katrína Mogensen og Ása Dýradóttir bjóða hlustendum að hlusta plötuna í heild sinni með kynningum á tilurð hennar eftir tíufréttir og í spilara.