Á gjörgæslu eftir alvarlega árás í Borgarnesi

27.10.2020 - 14:19
Loftmynd tekin með dróna af Borgarnesi
Borgarnes. Mynd úr safni. Mynd: Jóhannes Jónsson - RUV.IS
Karlmaður, sem varð fyrir alvarlegri árás í Borgarnesi í síðustu viku, var fluttur á gjörgæsludeild Landspítalans tveimur dögum eftir árásina þegar ástand hans versnaði mjög og talið „alvarlegt og lífshættulegt.“ Maðurinn var rifbeinsbrotinn, mögulega viðbeinsbrotin og kjálkabrotinn auk þess sem hann var með nokkur bitför í andliti. Eftir að hafa verið fluttur frá sjúkrahúsinu á Akranesi á Landspítalann í Fossvogi kom í ljós að annað lungað var samfallið.

Þetta kemur fram í gæsluvarðhaldsúrskurði Héraðsdóms Vesturlands þar sem árásarmaðurinn var úrskurðaður í gæsluvarðhald og einangrun til 2. nóvember. Landsréttur stytti gæsluvarðhaldið á föstudaginn til 29. október.

Í greinargerð lögreglustjórans á Vesturlandi kemur fram að þegar lögreglan hafi komið á vettvang hafi maðurinn sem fyrir árásinni varð staðið fyrir utan húsið, blóðugur í framan og haldið um brjóstkassann á sér. Hann hafi verið í heimsókn hjá árásarmanninum og ætlað að gista hjá honum um nóttina.

Þeir hefðu drukkið nokkuð og verið orðnir töluvert ölvaðir þegar húsráðandinn réðst á hann þar sem hann sat í rúmi í íbúðinni. Hann hefði kýlt hann með krepptum hnefa í andlit og líkama og bitið hann í andlit og vinstra eyra. Hann hefði haldið að maðurinn myndi drepa hann og því kýlt frá sér þannig að árásarmaðurinn rotaðist.  Í framhaldinu hefði hann komið sér út.

Lögreglan segir að þegar hún hafi farið inn í íbúðina hafi verið blóð, blóðslettur og blóðkám víða um gólf og á veggjum. Mikið af blóðblettum hafi verið á rúmfötum í rúmi þar sem brotaþolinn sagðist hafa verið þegar ráðist var á hann. Árásarmaðurinn lá á gólfinu með blóð á höndum og í andliti, hann hefði verið mjög ölvaður og ekki geta sagt hvað hafði gerst heldur kvartað undan höfuðverk og gat ekki staðið upp. Hann var síðan handtekinn eftir að læknar höfðu skoðað hann.

Við yfirheyrslur sagðist hann hafa neytt áfengis og sterkra verkjalyfja en mundi ekki eftir því að hafa kýlt eða bitið hinn manninn. Lögreglan telur framburð hans ekki fullnægjandi skýringu á hvað gerðist og á skjön við það sem hafi komið fram við rannsókn málsins. Mikilvægt sé að geta tekið skýrslu af manninum sem ráðist var á en það hafi ekki tekist þar sem hann sé á gjörgæslu og koma verði í veg fyrir að árásarmaðurinn geti haft áhrif á framburð hans.

freyrgigja's picture
Freyr Gígja Gunnarsson
Fréttastofa RÚV