Tveir smitaðir um borð í Norrænu

26.10.2020 - 19:24
Mynd með færslu
 Mynd: RÚV/Rúnar Snær Reynisson - Tollvörður á Seyðisfirði
Tveir farþegar um borð í farþegaskipinu Norrænu, sem er á leið til Seyðisfjarðar, hafa greinst með kórónuveirusmit. Smitin komu upp skömmu eftir brottför frá Hirtshals í Danmörku og hafa farþegarnir verið í eingangrun síðan og tveir aðrir í sóttkví.

„Enginn þessara fjögurra hefur einkenni smits og ekki er talin ástæða til að ætla að smit hafi borist í farþega eða áhöfn. Fjórmenningarnir munu fara í sýnatöku við komu og ætti niðurstaða hennar að liggja fyrir seinnipartinn á morgun eða annað kvöld,“ segir í tilkynningu frá lögreglunni á Austurlandi. 

Sýni verða tekin af öllum farþegum við komu til Seyðisfjarðar í fyrramálið. Þeir verða í sóttkví þar til niðurstaða seinni skimunar leggur fyrir. Tuttugu og sjö farþegar eru um borð.

„Óvænt hópsmit á Landakoti og í kjölfarið erfið staða á Landspítalanum sýnir glögglega mikilvægi þess að slaka hvergi á í persónubundnum smitvörnum. Vöndum okkur áfram, ferðumst ekki að óþörfu, munum fjarlægðarmörk, grímunotkun, handþvott og sprittnotkun,“ segir í tilkynningu lögreglunnar.