Athugið þessi frétt er meira en mánaðargömul.

Fimm sjúklingar smitaðir á Reykjalundi

24.10.2020 - 21:42
Mynd með færslu
 Mynd: Reykjalundur
Fimm sjúklingar á Reykjalundi greindust smitaðir af Covid-19 í kvöld. Í fyrradag greindust tveir starfsmenn á sólarhringsdeild smitaðir og einn í gær.

Starfsmennirnir tveir sem greindust í fyrrakvöld starfa báðir á Miðgarði, sólarhringsdeild með 14 rúmum. Á deildinni dvelja nú 16 sjúklingar þar sem Reykjalundur hefur verið að leggja sitt af mörkum síðustu daga með því að taka við sjúklingum af Landspítala til að létta þar á.

Um leið og grunur vaknaði um smit var stór hópur starfsmanna og sjúklinga settur í sóttkví. Þetta kemur fram í tilkynningu frá Reykjalundi rétt í þessu.

Þar segir að um leið og grunur kom upp um mögulega sýkingu, sem og eftir að jákvæð sýni greindust, hafi farið í gang markvissir verkferlar um sóttvarnir og varnir gegn smitleiðum. Aðgerðirnar eru gerðar í nánu samráði við Smitrakningarteymi Almannavarna og Landspítala.

„Í kvöld lágu fyrir niðurstöður úr sýnatöku og hefur því miður komið í ljós að fimm úr sjúklingahópnum eru jákvæðir fyrir Covid-veirunni og er einn þeirra kominn með einkenni. Umræddir sjúklingar verða af öryggisástæðum fluttir af Reykjalundi á Covid-deildir Landspítala síðar í kvöld. Sjúklingum og aðstandendum þeirra hefur verið kynnt staða mála.“ segir í tilkynninngunni.

Nú hafa 5 sjúklingar og 5 starfsmenn greinst jákvæðir fyrir Covid-veirunni undanfarna tvo sólarhringa á Reykjalundi. Jafnframt eru 19 aðrir starfsmenn Reykjalundar komnir í sóttkví vegna þessa eins og er, auk þeirra sjúklinga sem eftir verða á deildinni Miðgarði.

„Ekki er ljóst hvaðan Covid-smit hefur borist inn á deildina og mikilvægt er á þessari stundu að einbeita sér að velferð þeirra sem eiga um sárt að binda vegna þessa, frekar en að benda á mögulega sökudólga. Nærgætni og hlýja hafa sjaldan átt meira við en nú. Sem betur fer, hafa í ljósi stöðunnar verið í gildi mjög strangar sóttavarnarreglur á Reykjalundi síðustu vikur. Starfsemin hefur farið fram í skilgreindum sóttvarnarhólfum þannig að starfsemi Miðgarðs hefur verið aðskilin annarri starfsemi. Varðandi framhald á annarri starfsemi á Reykjalundi næstu daga verður gefin út tilkynning seinni partinn á morgun um næstu skref.“ segir í tilkynningunni. 

 

bjarnir's picture
Bjarni Rúnarsson
Fréttastofa RÚV