Athugið þessi frétt er meira en mánaðargömul.

Sumir skipverjar alvarlega veikir með öndunarerfiðleika

23.10.2020 - 16:15
Ísafjörður Höfnin Bryggja BátÍsafjörður Höfnin Bryggja Bátur skip Júlíus Geirmundsson ÍS270
 Mynd: Jóhannes Jónsson - RUV.is
Sumir í áhöfninni á Júlíusi Geirmundssyni sem veiktust af COVID-19 voru alvarlega veikir með háan hita og öndunarörðugleika. Þeir undrast orð sóttvarnalæknis í Kastljósi í gær um að ekkert hafi bent til þess að þarna væri hópsmit þegar umdæmislæknir sóttvarna hafi lýst því yfir að hann vildi fá skipverja í sýnatöku á þriðja degi veiðiferðar. Lyfjabirgðir voru ekki nægar um borð og því þurfti að handvelja þá sem voru veikastir og þurftu á verkjalyfjum að halda.

Þetta kemur fram í tilkynningu frá Verkalýðsfélagi Vestfirðinga. Þrettán af 25 í áhöfn skipsins eru í einangrun með COVID-19. Níu reyndust vera með mótefni og þrír þurfa að vera í sóttkví.  

Verkalýðsfélagið átti í dag fjarfund með þeim félagsmönnum sínum sem eru í áhöfn skipsins. Á þeim fundi kom fram að ástandið um borð hafi verið mjög alvarlegt. Hvorki útgerð né skipstjóri hafi séð ástæðu til að sigla skipinu til hafnar þannig að hægt væri að senda menn í sýnatöku þrátt fyrir að einhverjir væru með skýr einkenni um COVID-19.

Í yfirlýsingunni er fullyrt að skipstjórinn hafi skipað mönnum í einangrun meðan þeir voru sem veikastir. Aðstæður hafi verið skelfilegar þar sem þeir veiktust einn af öðrum og höfðu ekki aðrar bjargir en verkjalyf til að halda sér gangandi þar sem skipið var við veiðar og vinnsla í gangi. Hins vegar hafi lyfjabirgðir ekki verið nægar og því neyddust skipverjar til að handvelja þá sem voru veikastir og þurftu á verkjalyfjum að halda.   

Þá hefur félagið eftir skipverjum að þeir hafi ekki mátt ræða veikindi sín út á við en hafi fengið að tala við fjölskyldur sínar. „Ítrekað var að ræða ekki veikindin og á þriðju viku sjóferðar var sett á algert bann við að minnast á veikindin á samfélagsmiðlum eða við fréttamenn. Þannig var skipverjum haldið nauðugum og veikum við vinnu út á sjó, í brælu og lélegu fiskiríi á meðan COVID-sýking herjaði á áhöfnina.“

Félagið telur að miðað við þessar lýsingar sé ljóst að brotið hafi verið alvarlega gegn skipverjum og verið sé að fara yfir næstu skref í samráði við lögmenn. „Allir áhafnarmeðlimir í Verk Vest hafa ákveðið að fela félaginu umboð til að fara með sín mál er varða réttindi og launamál.“

Samkvæmt upplýsingum frá lögreglunni á Vestfjörðum er nú verið að fara yfir málið til að kanna hvort þarna hafi verið refsivert athæfi. 

Samkvæmt verklagsreglum eiga skip að tilkynna til Landhelgisgæslunnar ef upp kemur grunur um smit um borð. Í svari Gæslunnar til fréttastofu kemur fram að það hafi verið umdæmislæknir sóttvarna á Vestfjörðum sem hafi haft samband við stjórnstöð Landhelgisgæslunnar á mánudag. Þá hafði skipið verið að veiðum í nærri þrjár vikur.

Skipið kom til hafnar á Ísafirði á sunnudag að taka olíu. Gylfi Ólafsson, framkvæmdastjóri Heilbrigðisstofnunar Vestfjarða, sagði í fréttum RÚV á mánudag að enginn um borð væri það alvarlega veikur að hann þyrfti að leggjast inn á sjúkrahús.