Athugið þessi frétt er meira en 6 mánaða gömul.

Lagt til að flytja stjórnsýslu póstmála á Sauðárkrók

Mynd með færslu
 Mynd: rúv
Drög að frumvarpi um tilfærslu póstmála frá Póst- og fjarskiptastofnun til Byggðastofnunar voru birt í samráðsgátt stjórnvalda í dag. Með því á að leitast við að tryggja jafnan rétt landsmanna til alþjónustu póstsins.

Í frumvarpsdrögunum er Byggðastofnun falið það stjórnsýsluhlutverk að hafa eftirlit með póstþjónustu sem Póst- og fjarskiptastofnun hefur nú. Með því yrði áfram tryggð hagkvæm, skilvirk og áreiðanleg póstþjónusta, um allt land og til og frá landinu, segir í tilkynningu á vef samgöngu- og sveitarstjórnarráðuneytisins.

Með tilfærslunni yrði jafnframt hægt að samhæfa betur byggðasjónarmið og póstmál, en höfuðstöðvar Byggðastofnunar eru á Sauðárkróki.

Stefnt er að því að leggja frumvarpið fram samhliða nýjum lögum um Póst- og fjarskiptastofnun, en það er hluti af heildaryfirferð á lagaumhverfi stofnunarinnar. Frumvarpið er þó ekki háð þeirri heildaryfirferð, en þar segir að minni umsvif í almennum bréfasendingum gefi tækifæri til að einfalda hlutverk ríkisins þegar kemur að póstþjónustu. Mikilvægt sé þó að gæta að jafnræði landsmanna við slíka einföldun.

Frestur til að senda inn umsögn um frumvarpið er til fjórða nóvember.
 

andriyv's picture
Andri Yrkill Valsson
Fréttastofa RÚV