Hún ákallar andana og biður þá um hjálp, Fleetwood Mac goðsögnin Stevie Nicks í rokkballöðunni sinni Show Them the Way, lagið er það fyrsta sem hún sendir frá sér síðan platan 24 Karat Gold kom út 2014. Show Them The Way er byggt á draumi sem hana dreymdi í gamla daga. Henni til aðstoðar er Dave Grohl á trommur en ef þið hatið hann þá er lagið líka til í píanóútgáfu.
Síðasti söngull af nýrri plötu Sufjans Stevens, The Ascension, er lagið Sugar og fjallar um að taka sig saman í andlitinu og vera góður við annað fólk. Annars fer platan nokkuð vel í mannskapinn og þykir á sumum heimilum vera ein af plötum ársins.
Það hefur ekki mikið farið fyrir Lykke Li Timotej Zachrisson síðan hún söng titillagið á plötu, Marks Ronson, Late Night Tales. Í nýja laginu sínu, Bron, sem hún syngur á móðumálinu vinnur með hún landa sínum, tónskáldinu Ludwig Göransson sem er þekktastur fyrir vinnu sína með Childish Gambino.
Hávaðaseggurinn Daniel Lopatin hefur komið víða við í tónlistar -og kvikmyndabransanum en er líklega þekktastur fyrir Oneohtrix Point Never sem er gefið út hjá Warp útgáfunni. Í slagaranum Long Road Home vinnur hann með löndu sinni Caroline Polachek en platan Magic Oneohtrix Point Never kemur síðar á árinu.
Blake, James Blake er með allra hressasta móti í nýja laginu sínu, Before, sem er tekið af samnefndri sjöundu EP plötu kappans. Þó að Before sé engu U beygja hjá Blakearanum þá er ansi langt síðan að hann bjó til lag sem er danshæft og vel brúklegt á sveittum og syndugum klúbbi.
