Athugið þessi frétt er meira en mánaðargömul.

Enn fundað í kjaradeilu Rio Tinto og verkalýðsfélaganna

21.10.2020 - 23:40
Mynd með færslu
 Mynd: RÚV
Fundur í kjaradeilu Rio Tinto í Straumsvík og fimm verkalýðsfélaga stendur nú yfir hjá ríkissáttasemjara. Fundurinn hófst klukkan fjögur í dag. Verkfall skellur á í álverinu á föstudag, semjist ekki fyrir þann tíma.

Upphaflega átti verkfallið að hefjast síðasta föstudag, en samkomulag náðist um að fresta því um viku til að gefa samninganefndum meiri tíma til að reyna að ná samningi.

Komi til verkfalls nær það til starfsmanna í verkalýðsfélaginu Hlíf, Félagi iðn- og tæknigreina, Rafiðnaðarsambandinu, Félagi vélstjóra og málmtæknimanna og VR, alls um 400 starfsmanna. Verkfallið sem boðað er á föstudag er eins dags skæruverkfall, en ótímabundið allsherjarverkfall er boðað 1. desember, verði ekki búið að semja.

Kolbeinn Gunnarsson, formaður Hlífar, segir stefna í verkfall að óbreyttu en að vonir standi til að deilan mjakist áfram í kvöld. Hann vill ekki tjá sig um gang viðræðna eða hversu lengi verði fundað fram á nótt.

Samningar félaganna hafa verið lausir síðan í byrjun júlí, en samið hafði verið um launahækkun í mars með þeim fyrirvara að Rio Tinto næði nýjum raforkusamningum við Landsvirkjun fyrir lok júní. Þegar það tókst ekki féllu samningarnir úr gildi og var deilunni vísað til ríkissáttasemjara.