Athugið þessi frétt er meira en mánaðargömul.

Bærinn Asbestos í Kanada fær nýtt nafn um áramótin

20.10.2020 - 05:19
epa02256082 A picture dated 20 July 2010 shows a canteen named Cantine De L'Amiante (Asbestos Canteen) on the main street near the Jeffrey Mine in Asbestos, Quebec, Canada. The Jeffrey Mine in Asbestos is a white asbestos or chrysotile mine which began operating in the end of the 19th century. Chrysotile is only kind of asbestos that is nowadays used commercially worldwide, in counries like Russia, China, Brazil, and India, mainly as building material though it is banned or restricted in about 52 countries for health reasons.  EPA/ANDRE PICHETTE
Cantine de l'Amiante, eða Asbest-kaffistofan, í námabænum Asbestos í Quebec í Kanada. Mynd: epa
Bærinn Asbestos í Quebec-fylki í Kanada fær bráðum nýtt nafn, sem íbúar vona að laði fólk til bæjarins frekar en fæla það frá.

 

Asbestos er rúmlega 7.000 manna námabær í sunnanverðu Quebec-fylki. Í útjaðri hans er náma sem á sínum tíma var stærsta asbestnáma heims. Asbestið sem sótt var í hana var til skamms tíma mikið nýtt til einangrunar húsa og fleiri mannvirkja í stórum stíl en er nú óvíða notað og víða bannað vegna þess hve heilsuspillandi það hefur sýnt sig í að vera.

Franskan hefur tafið fyrir nafnbreytingu

Nafnbreyting hefur ítrekað komið til umræðu í bænum síðustu árin, vegna þeirra neikvæðu hugrenningatengsla sem Asbestos vekur í huga fólks. Í frétt BBC segir að það sem helst hafi tafið það ferli sé sú staðreynd að bærinn er í frönskumælandi fylki. Asbest nefnist nefnilega amiante á frönsku og því trufli Asbestos-nafnið bæjarbúa minna en ella.

Bæjarráð komst hins vegar nýverið að þeirri niðurstöðu að nafnið fældi erlenda fjárfesta og fyrirtæki frá bænum og ákvað því að efna til atkvæðagreiðslu um nýtt nafn meðal allra bæjarbúa, 14 ára og eldri.

Valið milli sex nafna

Eftir langt og ítarlegt ferli var ákveðið að valið skyldi standa milli sex nafna; L'Azur-des-Cantons, Jeffrey-sur-le-Lac, Larochelle, Phénix, Trois-Lacs og Val-des-Sources. Rétt rúmlega helmingur bæjarbúa sagði sitt álit og valdi bænum nafnið Val-des-Sources, sem á íslensku gæti útlagst sem Dalur lindanna eða einfaldlega Lindadalur. Trois-Lacs, eða Þrjú (stöðu)vötn varð í öðru sæti.

Nafnabreytingin tekur ekki formlega gildi fyrr en um áramót og BBC hefur eftir Hugues Grimard, bæjarstjóra Asbestos, að skiltunum með nafni bæjarins verði ekki breytt alveg strax. Það gæti þó gerst eitthvað fyrir áramótin, og jafnvel fyrir jól - „Það væri hugguleg jólagjöf," segir bæjarstjóri Lindadals í Kanada. 

 

Ævar Örn Jósepsson
Fréttastofa RÚV