Athugið þessi frétt er meira en mánaðargömul.

Rjúpnastofninn með minnsta móti og hvatt til hófsemdar

19.10.2020 - 16:16
Mynd með færslu
 Mynd: Rögnvaldur Már Helgason - RÚV
Umhverfisstofnun höfðar til ábyrgðar rjúpnaveiðimanna og hvetur þá til hóflegrar veiði, enda veiðistofninn nú einn sá minnsti frá því mælingar hófust fyrir aldarfjórðungi.

Rjúpnaveiðitímabilið hefst fyrsta nóvember og stendur út nóvembermánuð. Heimilt verður að veiða fimm daga vikunnar, en á miðvikudögum og fimmtudögum verður veiðibann. Fyrirkomulag veiðanna er óbreytt frá því sem ákveðið var á síðasta ári og er það byggt á mati Náttúrufræðistofnunar Íslands á veiðiþoli rjúpnastofnsins.

Mælingar á stofninum hófust árið 1995 og aðeins einu sinni áður hefur hann verið metinn svo lítill, en það var árið 2002. Bjarni Pálsson teymisstjóri hjá Umhverfisstofnun segir á heimasíðu stofnunarinnar í dag að af þessum sökum sé mjög mikilvægt að veiðimenn gæti hófsemi og þá sérstaklega á Norðausturlandi. Hann minnir líka á að bannað sé að selja rjúpur og að því verði fylgt eftir líkt og undanfarin ár. Vegna þess hve viðkvæmur stofninn sé sé höfðað til ábyrgðar veiðimanna og Umhverfisstofnun hafi fulla trú á að þeir standist prófið.  

Þá eru veiðimenn sérstaklega beðnir um að gera hvað þeir geta til að særa ekki fugl umfram það sem þeir veiða, meðal annars með því að ljúka veiðum áður en rökkvar.
 

 

holm's picture
Haukur Holm
Fréttastofa RÚV