Athugið þessi frétt er meira en mánaðargömul.

Íþróttatímar úti og ekkert skólasund

19.10.2020 - 22:49
Mynd með færslu
 Mynd:
Skóla og íþróttasvið allra sveitarfélaga á höfuðborgarsvæðinu hafa ákveðið í samráði við almannavarnir höfuðborgarsvæðisins að öll íþróttakennsla muni fara fram utandyra að teknu tilliti til ítrustu sóttvarna. Öll íþróttamannvirki og sundlagar sveitarfélaga verða lokuð.

Þetta kemur fram í tilkynningu frá almannavarnanefnd höfuðborgarsvæðisins í kvöld. 

„Eftir ítarlega yfirferð yfir stöðuna og í ljósi leiðbeininga sóttvarnaryfirvalda og í samráði við almannavarnir höfuðborgarsvæðisins hafa skóla- og íþróttasvið allra sveitarfélaga á höfuðborgarsvæðinu tekið þá ákvörðun að öll íþróttakennsla muni fara fram utandyra að teknu tilliti til ítrustu sóttvarna og einnig mun skólasund falla niður. Öll íþróttamannvirki og sundlaugar á vegum sveitarfélaganna verða lokuð. Söfn sem rekin eru á vegum sveitarfélaganna verða einnig lokuð. Þessi ákvörðun verður endurskoðuð að viku liðinni, í takt við álit sóttvarnalæknis.“ segir í tilkynningunni.

Þar segir einnig að staða faraldursins sé viðkvæm á höfuðborgarsvæðinu. Smitum hafi fækkað seinustu daga en mikilvægt sé að tök náist á þeirri bylgju faraldursins sem nú gengur yfir svo hægt verði að drqaga aftur úr sóttvarnarráðstöfunum í stað þess að herða á þeim enn frekar. 

„Sóttvarnaryfirvöld og almannavarnir hafa hvatt alla og höfuðborgarsvæðið sérstaklega til að halda áfram að koma í veg fyrir hópamyndun, nánd og blöndun aðila úr ólíkum áttum næstu vikur. Markmiðið er að draga úr dreifingu og vexti veirunnar og vinna gegn auknu álagi á heilbrigðiskerfið. Samfélagið á mikið undir því að það takist að halda skólastarfi gangandi. Því er lögð áhersla á að takmarka blöndun barna og unglinga milli ólíkra leik- og grunnskóla höfuðborgarsvæðisins. Að öðrum kosti getur eitt smit leitt til að óþarflega stórir hópar eða fleiri en einn skóli þurfi að fara í einangrun eða sóttkví. “ segir í tilkynningunni.