Jarðskjálfti norðvestur af Húsavík

17.10.2020 - 22:49
Mynd með færslu
 Mynd: Veðurstofa Íslands
Jarðskjálfti, 3,3 að stærð, varð skammt út af Húsavík laust eftir klukkan tíu í kvöld. Upptök skjálftans voru á tæplega 10 kílómetra dýpi, aðeins 2,1 kílómetra norðvestur af Húsavík og varð hans því vel vart í byggð. Engar fregnir hafa borist af tjóni. Nokkrir minni skjálftar hafa fylgt í kjölfarið, sá öflugasti mældist 2 að stærð.

Hrina skjálfta sem hefur verið í slitróttum gangi á Húsavíkur-Flateyjar-misgenginu og Eyjafjarðarálnum frá því snemma í sumar tók sig upp aftur þann 5. október. Á heimasíðu Veðurstofunnar kemur fram að þar mældust um 650 skjálftar vikuna 5. - 11. október. Þar af voru sjö skjálftar stærri en 3. Þeir urðu allir í sömu hrinunni, aðfaranótt 6. október, og mældist sá öflugasti 4,1. 
 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi