Athugið þessi frétt er meira en mánaðargömul.

Lögregla lýsir eftir vitnum að brunanum í Grafningi

12.10.2020 - 10:34
Mynd með færslu
 Mynd: Birgir Þór Harðarson
Vegna rannsóknar sinnar á bruna í húsbíl á föstudagskvöld þar sem maður lést lýsir lögreglan á Selfossi eftir fólki sem var á ferðinni í Grafningi og þar í grennd frá klukkan tíu til miðnættis það kvöld.

Í tilkynningu frá lögreglunni er fjallað um það sem Morgunblaðið greindi frá í morgun, að hringt hafi verið á Neyðarlínu um hálftólf um kvöldið og tilkynnt um eldinn. Þar hafi átt að gefa innhringjandanum samband við fjarskiptamiðstöð lögreglu en enginn hafi svarað.

Í Morgunblaðinu kemur líka fram að tilkynnandinn hafi sagst hafa séð bílljós á vettvangi þegar eldurinn var sem mestur og því vilji lögregla fá upplýsingar frá þeim sem þar kunni að hafa verið á ferðinni.

Tilkynning lögreglu:
„Við rannsókn á bruna í húsbíl í landi Torfastaða í Grafningi hefur komið fram að um kl. 23:30 föstudaginn 9. október var tilkynnt til Neyðarlínu um eld sem gæti mögulega verið í bíl eða húsi og tiltekið í tilkynningunni að eldurinn væri í landi Torfastaða. Tilkynnanda var gefið samband frá Neyðarlínu til fjarskiptamiðstöðvar lögreglu en þar virðist, að hans sögn, hafa hringt út.

Fleiri hafa haft samband við lögreglu með upplýsingar um málið og þökkum við fyrir þær. Í ljósi þeirrar tímasetningar á brunanum sem nú liggur fyrir óskum við sérstaklega eftir að heyra frá þeim sem voru á ferðinni í Grafningi og þar í grennd á tímabilinu frá því um kl. 22:00 og fram að miðnætti á föstudagskvöldinu s.l. Tilkynnandi sá sem hringdi í Neyðarlínu talaði sérstaklega um mögulega umferð ökutækis við brunavettvanginn þegar eldurinn var hvað mestur og óskar lögreglan eftir því að fá upplýsingar frá þeim sem þar hefur mögulega verið á ferðinni.   Upplýsingum má koma til lögreglu í síma 444-2000, á facebook eða í tölvupósti á netfangið [email protected].“