Athugið þessi frétt er meira en 9 mánaða gömul.

Enn þá flest smit á höfuðborgarsvæðinu

08.10.2020 - 13:07
Mynd með færslu
 Mynd: RÚV - Ljósmynd
Fleiri sjúklingar með COVID-19 hafa verið lagðir inn á Landspítalann síðasta sólarhringinn. Þeir eru nú orðnir 23. Í gær greindust 94 kórónuveirusmit. Langflest smitin eru á höfuðborgarsvæðinu.

 

Sóttvarnaraðgerðir voru hertar á höfuðborgarsvæðinu í gær. Þar mega 20 koma saman. Veitingastaðir eiga að loka klukkan 21. Líkamsræktarstöðvum og sundstöðum hefur verið lokað.

Í morgun sendi ríkislögreglustjóri út tilkynningu um sóttvarnir á höfuðborgarsvæðinu. Þær eru sem hér segir:

  • Vera eins mikið heima og hægt er.
  • Fara ekki til eða frá höfuðborgarsvæðinu meira en nauðsynlegt er.
  • Helst fari aðeins einn úr hverri fjölskyldu í búðir.
  • Takmarka enn frekar heimsóknir til fólks sem er viðkvæmt fyrir sýkingum.
  • Helst fari aðeins þeir í sund sem þurfa að gera það vegna heilsu sinnar.
  • Jógahópar, gönguhópar, kórar, hjólahópar og aðrir slíkir hópar, geri hlé á starfsemi sinni næstu tvær vikur.
  • Viðburðum sem eiga að fara fram næstu tvær vikur verði frestað.
  • Allir staðir og verslanir á höfuðborgarsvæðinu tryggi fjöldatakmarkanir eins vel og hægt er og séu með handspritt fyrir alla.
  • Höfuðborgarsvæðið er Reykjavík, Kópavogur, Garðabær, Hafnarfjörður, Seltjarnarnes og Mosfellsbær. Kjalarnes og Kjósarhreppur eru líka á höfuðborgarsvæðinu.

Tilkynninguna má annars lesa hér:

  • Sóttvarnalæknir og almannavarnadeild ríkislögreglustjóra ítreka tilmæli sín vegna aukins fjöldi smita einkum á höfuðborgarsvæðinu, vegna Covid-19 síðustu daga og aukið hafa líkur á veldisvexti í faraldrinum. Búast má við að tölur um fjölda smita verði háar næstu daga. Tilmælin eru;
  • Hvetjum alla á höfuðborgarsvæðinu til að vera eins mikið heimavið og kostur er.
  • Ekki vera á ferðinni til eða frá höfuðborgarsvæðinu nema nauðsyn sé til.
  • Verjum viðkvæma hópa og takmörkum heimsóknir til einstaklinga í áhættuhópum eins og hægt er.
  • Takmörkun fjölda í búðum – einn fari að versla frá heimili ef kostur er
  • Hvatt er til þess að þeir sem standi fyrir viðburðum á höfuðborgarsvæðinu fresti þeim
  • Klúbbar, kórar, hlaupahópar, hjólahópar og aðrir hópar sem koma saman geri hlé á starfsemi sinni.
  • Allir staðir á höfuðborgarsvæðinu þar sem almenningur á erindi herði allar sínar sóttvarnaraðgerðir, takmarki eins og hægt er fjölda, tryggi að allir geti sótthreinsað hendur við innganga, sótthreinsi snertifleti og gæti vel að hægt sé að virða fjarlægðarmörk.
  • Íþróttafélög á höfuðborgarsvæðinu geri hlé á æfingum og keppni í öllum íþróttum.
  • Íþróttafélög á höfuðborgarsvæðinu fresti keppnisferðum út á land.
  • Allir sem finni fyrir hinum minnstu einkennum haldi sig heima, fari í sýnatöku og líti á að þeir séu í einangrun þar til neikvæð niðurstaða úr sýnatöku liggi fyrir.