Athugið þessi frétt er meira en 7 mánaða gömul.

Forseti Íslands hvetur landsmenn til að fylgja tilmælum

06.10.2020 - 22:09
Mynd með færslu
 Mynd: Helena Reynis - Guðni Th. Jóhannesson
„Ég hvet alla til að fylgja tilmælum og leiðbeiningum og verða þannig að liði í þessu ágæta samfélagi okkar,“ skrifar Guðni Th. Jóhannesson, forseti Íslands, í færslu á Facebook-síðu sinni í kvöld.

Með færslunni birtir Guðni teiknaða mynd af sér með svarta grímu. Í neðra hægra horni teikningarinnar stendur Helena Reynis '20.

Forsetinn minnir landsmenn á þann vanda sem nú blasir við þjóðinni og hvetur til samstöðu: „Við erum í vanda. Á morgun verða varnir gegn veirunni skæðu þess vegna hertar enn frekar. Nýjar reglur gilda um höfuðborgarsvæðið. Kynnum okkur allar upplýsingar á covid.is. Stöndum saman í þessu. Við gerðum það í vor og getum það enn,“ skrifar hann. 

Þá bendir hann fólki á að nú sé ekki tíminn til að velta vöngum yfir því sem betur hefði mátt fara: „Einhugur kemur okkur öllum til góða en langmest þeim sem á því þurfa helst að halda, fólkinu sem er veikast fyrir og þeim sem sinna sjúkum. Í stritinu miðju stoðar lítt að velta vöngum yfir því hvað hefði kannski mátt gera öðruvísi, ræðum það síðar.“

„Ég hvet alla til að fylgja tilmælum og leiðbeiningum og verða þannig að liði í þessu ágæta samfélagi okkar. Samstaða í þágu þjóðar, þrautseigja í verki. Látum þetta sannast um okkur. Við erum öll almannavarnir. Sýnum hvað í okkur býr,“ segir í færslunni að lokum.