Víðir Reynisson yfirlögregluþjónn segir að það sýni alvarleika faraldursins að almannavarnir hafi boðað neyðarstig. Þá sagði hann að mikið samfélagslegt smit væri í gangi, og meira en vonast var til að yrði.
Fólk sem fréttastofa ræddi við í dag sýnir hertum aðgerðum skilning en segist vera orðið þreytt á ástandinu eins og sjá má í myndskeiðinu sem fylgir.
Hvað finnst þér um þessar hertu sóttvarnareglur sem taka gildi á miðnætti?
„Ég er bara mjög ánægð með þær. Það var kominn tími til. Ég hefði viljað hafa þetta fyrr,“ segir Arna María Kjartansdóttir.
„Mér finnst þær sjálfsagðar. Bara bráðnauðsynlegar. Ég fer ekki í eldri borgara-starfið nema mjög lítið. Hitti fólkið mitt ekki mikið,“ segir Birna Markúsdóttir.
„Maður skilur alveg að þeir þurfi að herða á en á sama tíma þá er líkamsræktin mikilvæg til að halda andlegri heilsu og geði. Eru ekki allir orðnir þreyttir á þessu ástandi? Maður verður bara að reyna að gera sitt besta,“ segir Hörður Helgi Hallgrímsson.
„Það er verið að setja alla undir sama hatt og að loka líkamsræktarstöðvum á Akureyri er náttúrulega bara stórfurðulegt. Þetta er voðalega skrýtið. Ég er mættur hérna á sunnudegi því ég kemst ekki á morgun. Ég þarf að hreyfa mig á hverjum degi bara til þess að halda heilsu og halda styrk,“ segir Óskar Finnsson.
