Alexei Navalny. Mynd: EPA-EFE - EPA
Athugið þessi frétt er meira en 5 mánaða gömul.
Sakar Navalny um að vinna með CIA
Talsmaður rússnesku ríkisstjórnarinnar sakar stjórnarandstöðuleiðtogann Alexei Navalny um að starfa með bandarísku leyniþjónustunni, CIA. Ásökunin er svar Kremlar við þeirri yfirlýsingu Navalnys, að hann gruni Pútín Rússlandsforseta um að vera ábyrgan fyrir því að honum var byrlað eitur á dögunum.
Ummerki um taugaeitur fundust í Navalny
Eitrunin var svo alvarleg að Navalny missti meðvitund og lá þungt haldinn á sjúkrahúsi dögum saman, fyrst í Rússlandi og síðar í Þýskalandi. Þýskir læknar staðfestu að ummerki um taugaeitrið Novichok hefðu greinst í sýnum sem tekin voru úr honum.
Sjá einnig: Biður Navalny afsökunar á að hafa þróað novichok
Óásættanlegar, tilhæfulausar og meiðandi aðdróttanir
Dmitry Peskov, talsmaður Kremlarstjórnarinnar, sagði aðdróttanir Navalnys í garð Pútíns óásættanlegar, tilhæfulausar og meiðandi. „Það er ekki sjúklingurinn sem vinnur með vestrænni leyniþjónustu, það er vestræna leyniþjónustan sem vinnur með honum. Það er réttari lýsing," sagði Peskov. „Upplýsingar um slíkt liggja fyrir. Ég get meira að segja fullyrt að sérfræðingar bandarísku leyniþjónustunnar starfa með honum um þessar mundir."
Navalny svaraði þessu með því að hóta Peskov lögsókn og krefjast þess að hann birti meint sönnunargögn um samstarfið við CIA og sýna þau í sjónvarpi.
