Skiptar skoðanir um jafna skiptingu fæðingarorlofs

Mynd með færslu
 Mynd: Wayne Evans - Pexels
Nokkuð skiptar skoðanir eru um jafna skiptingu fæðingarorlofs milli foreldra í nýju frumvarpi Ásmundar Einars Daðasonar, félags- og barnamálaráðherra. Formaður BSRB segir frumvarpið skref í átt að jafnrétti en þingmaður Sjálfstæðisflokksins telur það skerða frelsi fjölskyldna. Ráðherra segir það kunna vel að vera að frumvarpið taki breytingum.  

Samkvæmt núgildandi lögum er orlofið nú samtals tíu mánuðir, fjórir mánuðir á hvort foreldri og að auki tveggja mánaða sameiginlegur réttur sem foreldrar velja hvernig þeir ráðstafa. Til stendur að lengja fæðingarorlofið í tólf mánuði um áramótin og í frumvarpi félagsmálaráðherra er lagt til að því verði skipt jafn þannig að hvort foreldri fái sex mánuði, en verði heimilt að færa einn mánuð sín á milli. Þá er lagt til að það tíma­bil sem for­eldrar hafa til að taka fæð­ing­ar­or­lof verði stytt úr tveimur árum í eitt og hálft ár.

Sjá einnig: Meira svigrúm í nýjum fæðingarorolofslögum
 
„Markmiðið er að útfæra þessa lengingu fæðingarorlofsins og fara yfir ýmis atriði sem hafa brunnið á síðustu ár,“ segir Ásmundur Einar.

Ljóst er að þó að orlofið lengist samtals í tólf mánuði verður sá hluti fæðingarorlofs sem foreldrar geta skipt á milli sín styttur, samkvæmt frumvarpinu. Margir telja þetta skref í átt að kynjajafnrétti. Sonja Þorbergsdóttir, formaður BSRB, segir á Facebooksíðu sinni að það sé löngu tímabært að skipta orlofinu jafnt milli foreldra. En fyrirkomulagið hefur líka verið gagnrýnt. Vilhjálmur Árnason, þingmaður Sjálfstæðisflokksins, segir í aðsendri grein í Morgunblaðinu að frumvarpið feli í sér skerðingu á frelsi fjölskyldna og dragi úr möguleikum til að mæta þörfum og hag barns­ins hverju sinni.  

Frumvarpið byggir á tillögum samstarfshóps sem skipaður var í fyrra til að vinna að heildarendurskoðun laga um fæðingar- og foreldraorlof.

„Það var skipuð sérstök nefnd til að fara yfir þetta með öllum aðilum vinnumarkaðar. Þeir skiluðu þessu frumvarpi til mín og það er núna komið í samráðsgátt og það kann vel að vera að það taki einhverjum breytingum þar,“ segir Ásmundur Einar. 

Þórhildur Þorkelsdóttir
Fréttastofa RÚV
Síðast:
Þessi þáttur er í hlaðvarpi