Athugið þessi frétt er meira en 2 ára gömul.

Fangaskipti samþykkt í Jemen

27.09.2020 - 01:48

Deilur og stríð · Erlent · Asía · Jemen · Miðausturlönd

Brynvagn stjórnarliða við Hodeida. Mynd:

Stríðandi fylkingar í Jemen samþykktu fangaskipti í gær fyrir milligöngu Sameinuðu þjóðanna. Alls fara yfir þúsund fangar á milli stjórnvalda og uppreisnarhreyfingar Húta.

Stjórnvöld, sem eru studd af hernaðarbandalagi Sádiaraba, samþykktu að skiptast á um 15 þúsund föngum við Húta eftir viðræður í Svíþjóð fyrir tveimur árum. Síðan þá hafa orðið nokkur fangaskipti. Nýja samkomulaginu á að framfylgja innan tveggja vikna, hefur AFP fréttastofan eftir samningamanni úr röðum stjórnvalda. Samningurinn verður tilkynntur formlega í dag að sögn heimildamanns úr röðum Húta.

Viðræðurnar voru haldnar á ótilgreindum stað í Sviss. Þær hófust 18. september, og var í fyrstu rætt um skipti ríflega 1.400 fanga. Meðal þeirra átti að vera bróðir forsetans Abedrabbo Mansour Hadi, sem er í haldi uppreisnarmanna. Það fékkst ekki samþykkt að sinni að sögn samningamanns úr röðum stjórnvalda. Alþjóðanefnd Rauða krossins hefur umsjón með fangaskiptunum.

Tugþúsundir hafa fallið í borgarastríðinu í Jemen. Langflest fórnarlambanna eru almennir borgarar. Sameinuðu þjóðirnar segja mannúðarástandið í landinu það versta í heiminum.