Nýliðarnir unnu deildarmeistarana

Mynd með færslu
 Mynd: RUV

Nýliðarnir unnu deildarmeistarana

20.09.2020 - 09:25
Nýliðar Hamars í úrvalsdeild karla í blaki tóku á móti deildarmeisturum síðustu leiktíðar, Þrótti frá Neskaupsstað í fyrsta leik deildarinnar í gærkvöldi. Hamar byrjaði leikinn vel og vann að lokum öruggan sigur.

Leikurinn fór fram í Hveragerði og var leikið fyrir luktum dyrum samkvæmt fyrirmælum Blaksambands Íslands en fyrirkomulagið var ákveðið í kjölfarið á upplýsingafundar Almannavarna í dag.

Hamarsmönnum var, þrátt fyrir að vera nýliðar, spáð efsta sæti af þjálfurum og fyrirliðum í deildinni fyrir mót og má segja að liðið hafi staðið undir væntingum í fyrsta leik.

Sigur Hamars var öruggur en Þróttur átti þrátt fyrir það góða spretti og lét Hamarsmenn vinna fyrir stigunum þremur.  Lokastaðan í leiknum var 3-0 fyrir Hamar og unnust hrinurnar 25-22, 25-21 og 25-16.

Stigahæstur í liði Hamars var Jakub Madej með 13 stig en stigahæstur í leiknum var Miguel Angel Ramos Melero leikmaður Þróttar með 14 stig.