Hershöfðingi heilbrigðisráðherra Brasilíu

epa08674521 President of Brazil, Jair Bolsonaro, participates in the swearing-in ceremony of general Eduardo Pazuello (L), as Minister of Health at Planalto Palace in Brasilia, Brazil, 16 September 2020. Bolsonaro swore in General Pazuello as Minister of Health, a position he held temporarily since last May, with a renewed defense of chloroquine to treat the coronavirus.  EPA-EFE/Joedson Alves
 Mynd: EPA-EFE - EFE
Hershöfðingi sem hefur enga reynslu af heilbrigðismálum var skipaður heilbrigðisráðherra Brasilíu í gær. Hann er þriðji ráðherra heilbrigðismála í landinu frá því kórónuveirufaraldurinn skall á.

Jair Bolsonaro forseti tilnefndi hershöfðingjann Eduardo Pazuello tímabundið í maí síðastliðnum. Hann er ellefti hermaðurinn í 23 manna ráðuneyti Bolsonaros.

Hann, ólíkt forverum sínum, er sammála forsetanum um hvernig bregðast eigi við útbreiðslu faraldursins. Þar á meðal má nefna að þeir hvetja báðir lækna til að ávísa gigtarlyfinu hydroxychloroquine án þess að fyrir liggi óyggjandi sönnun á virkni þess gegn Covid-19.

Við innsetningarathöfnina sagði forsetinn rannsóknir sýna að koma hefði mátt í veg fyrir 30% dauðsfalla af völdum Covid-19 hefði lyfið verið gefið í tíma. Hann tiltók þó ekki hvaða rannsóknir hann ætti við. 

Þeir eru sömuleiðis mjög gagnrýnir á landstjóra þeirra sambandsríkja Brasilíu sem beitt hafa útgöngubanni til að hafa hemil á útbreiðslu veirunnar. Opinberar tölur sýna að nú hafa 134 þúsund látist af völdum Covid-19 í Brasilíu sem telur 212 milljónir íbúa. 

markusthth's picture
Markús Þ. Þórhallsson
Fréttastofa RÚV
Síðast:
Þessi þáttur er í hlaðvarpi