Höfðu tvær vikur til að flytja fjölskylduna úr landi

ríkislögreglustjóri, húsnæði ríkislögreglustjóra
 Mynd: ruv.is
Stoðdeild ríkislögreglustjóra hafnar fullyrðingum Magnúsar D. Norðdahls, lögmanns Khedr-fjölskyldunnar, sex manna fjölskyldu frá Egyptalandi, um að embættið hafi haft sex vikur til að flytja fjölskylduna úr landi á gildum skilríkjum og að Þorsteinn Gunnarsson sviðsstjóri Útlendingastofnunar hafi ekki farið með rétt mál í Kastljósi í gærkvöldi.

Þetta kemur fram í yfirlýsingu frá stoðdeild ríkislögreglustjóra.

Flytja átti fjölskylduna úr landi í morgun en hún var þá ekki á þeim stað sem fyrirfram hafði verið ákveðinn. Ekki er vitað um dvalarstað fólksins.

Í yfirlýsingunni segir að beiðni um að framfylgja ákvörðuninni hafi borist stoðdeild frá Útlendingastofnun 13. janúar. „Það er ekki rétt að stoðdeild ríkilögreglustjóra hafi haft sex vikur til að flytja fjölskylduna úr landi á gildum skilríkjum. Beiðni um framkvæmd ákvörðunar barst stoðdeild frá Útlendingastofnun þann 13.1. 2020, tveimur vikum áður en skilríki tveggja fjölskyldumeðlima runnu út, 28.1. 2020,“ segir í yfirlýsingunni.

„Úrskurður kærunefndar útlendingamála sem staðfesti ákvörðun Útlendingastofnunar um að synja fjölskyldunni um vernd var birtur 18. nóvember 2019. Fjölskyldunni var veittur 30 daga frestur til sjálfviljugrar heimfarar sem rann út 18. desember. Í millitíðinni óskaði fjölskyldan eftir því að kærunefnd útlendingamála frestaði réttaráhrifum úrskurðarins til að fara með málið fyrir dómstóla en þeirri beiðni var hafnað af kærunefnd 10. janúar.“

Í yfirlýsingunni segir að þegar ljóst var að fjölskyldan hygðist ekki fara sjálfviljug til heimalands síns og að réttaráhrifum yrði ekki frestað hafi Útlendingastofnun vísað málinu til stoðdeildar ríkislögreglustjóra til framkvæmdar með beiðni dagsettri 13. janúar.

Ekki hafi verið unnt að skipuleggja flutning fjölskyldunnar til heimalands á þeim tveimur vikum sem skilríki allra í fjölskyldunni voru gild. Slíkar fylgdir krefjist lengri undirbúnings, meðal annars að afla heimilda fyrir íslenska lögreglumenn til að ferðast til og í gegnum þau ríki sem ferðaleiðin gerir kröfu um.

„Vinna við undirbúning fylgdarinnar hófst eftir að málið kom á borð stoðdeildar og var strax ljóst að afla þyrfti gildra skilríkja, annað hvort með framlengingu eða útgáfu nýrra skilríkja. Stoðdeild átti í samskiptum við lögmann fjölskyldunnar um þessa stöðu og tók hún þá ákvörðun að óska ekki eftir framlengingu vegabréfanna.“

 

annalth's picture
Anna Lilja Þórisdóttir
Síðast:
Þessi þáttur er í hlaðvarpi